भजन गीत 38

पसतावा चो पारथना

चेगावा चो सूरता करुन दाउद गावलो भजन-गीत

हे जहोवा, रीस ने मोके दागा नी देस,

आउर खुबे रीस होउन मोके डंड नी देस!

2 कसनबलले तुचो कांडमन मोके भीतर ले गड़लीसे;

आउर तुचो हाथ खाले मय चेपाय होलेसे।

3 तुचो रीस किरता

मोचो देहें ने दुखा धरलीसे;

मोचो पाप किरता

मोचो हाथ-पांय बसलीसे।

4 मोचो ओधरम बुतामन मोके बुड़ाली;

आउर बोउक नी सकतो बड़े भारी बोजा असन होलीसे।

5 मय एड़जा रलो किरता

मोचो घावमन कुउन घिन-घिना गंधेसे।

6 मय खुबे दुख-तकलीस ले थाकुन लोंवलेसे;

आउर रात-मंजन गागा-बोगा होयंसे।

7 कसनबलले मोचो करांड टुटलो असन लागेसे,

आउर मोचो देहें ने दुखा धरलीसे।

8 मय निमल होउन खुबे कुट-कुटा होलेसे;

मोचो मन चो खुबे दुख किरता मय कहरेंसे।

9 ए परभु, मोचो सपाय मन-इछा के तुय जानीस,

मोचो कहरतोर तुचो ले नी लुकलीसे।

10 मोचो जीव धक-धक करेसे, मोचो सकत सरेसे;

मोके झांवरी-झांवरी दखुक होयसे।

11 बेमार-अजार पड़लोके मोचो मीतमन आउर संगवारीमन मोके छांडला,

मोचो कुटुम-लोग बले मोचोले अलगे होला।^†

12 मोचो जीव धरतो लोग मोचो काजे फांदा मंडायसोत,

आउर मोचो नोकसान करुक मन करतो लोग मोचो बिरुद बलसोत,

आउर रात-मंजन कपट उआटमन करसोत।

13 मानतर मय भयरा असन सुने ची नाई;

आउर कोंदा असन ओगाय रयंसे।

14 मय हुन भयरा मनुक असन होलेसे,

जेचो टोंड ले बला-बली होतो असन गोट नी निकरे।

15 मानतर ए जहोवा, मय तुचेई उपरे आसा करलेसे;

ए परभु, मोचो महापरभु, तुय ची उत्‍तर देसे।

16 मय बलले, मोचो बिरुद ढोंग दखाउमन के

मोचो पांय फिसललोने हरिक होउक नी देस!

17 कसनबलले मय घसरतो असन होलेसे,

आउर मय अमदेया दुख-तकलीस ने आंसे।

18 मय आपलो ओधरम के मानेंसे,

आउर मोचो पापमन किरता पसतायंसे।

19 मोचो बयरीमन खुबे बलेयार आत,

आउर मोके फोकाहा बिरुद करतो लोग खुबे होलासोत।

20 भलई करतो किरता हुनमन मोचो बिरुद करसोत,

आउर भलई चो पलटा अडरा करसोत।

21 ए जहोवा, मोके नी छांड,

ए मोचो महापरभु, मोचोले लापी नी हो!

22 ए मोचो मुक्‍ति देउ महापरभु,

मोके साका होतो काजे झटके आव!