दुसट मनुक
बजनेया मुखिया काजे जहोवा चो कमेया दाउद चो भजन-गीत
36
दुसट चो मन भीतरे ओधरम भोरलीसे;आउर हुन महापरभु के मुरे नी डरे।†
2 हुन आपलो ओधरम दखा नी देओ आउर हिनस्ता होउक नी होओ बलते
आपलो मने फोबानी गोटमन बिचारेसे।
3 हुनचो टोंड ले दुसट आउर कपट गोटमन निकरुआय;
हुनके नंगत बुद नीआय आउर भलई बुता करुक छांडलोसे।
4 हुन आपलो ओचना ने सोवलो थान ले दुसट उआटमन बिचारते रयसे;
हुन आपलो अडरा बाट ने चमकट रयसे;
आउर अडरा बुता करुक नी छांडे।
महापरभु जीव-दुखतोर
5 ए जहोवा, तुचो सत-मया सरग के टेकलीसे
आउर बादरी चो डेंग इतलो तुय पतेयातो लाईक आस।
6 तुचो धारनिक, डेंग डोंगरीमन असन आय,
तुचो नियाव, गड़िया समदूर असन आय;
ए महापरभु, तुय मनुक आउर जनावरमन चो रखेया करुआस।
7 ए महापरभु, तुचो सत-मया खुबे मोल चो आय!
लोगमन तुचो पाटकी खाले तुचो सरन ने रयसोत।
8 तुचो मंदिर ने मिरतो खादी-पीदी ले हुनमन अस्तिर होदे;
आउर तुय आपलो सुख चो नंदी ले हुनमन के खुआसे।
9 कसनबलले जीव चो पजरा तुयचे आस;
तुचो उजर किरता आमी जीव रउंसे।
10 तुके जानतो लोग के सत-मया करते रा,
सोज लोग चो मंजी आपलो धारनिक बुता दखाते रा!
11 मोके गुमानीमन चो हक ने होउक नी देस;
आउर दुसटमन मोके खेदुक नी सकोत।
12 ओधरमीमन घसरलासे;
हुनमन के असन कचाड़लोसे कि हुनमन फेर उठुक नी सकोत।