बयरीमन ले बचातो काजे गुहार
दाउद चो भजन-गीत
35
ए जहोवा, जोन मोचो बिरुद ने आसोत, तुय बले हुनमन चो बिरुद हो;जोन मोचोले लड़सोत, हुनमन ले तुय बले लड़!
2 ढाल धरुन आउर झिलम पींदुन
मोचो साका होतो काजे पुरे आव!
3 भाला आउर खांडा धर
आउर मोके खेदतो लोग चो पुरे एउन हुनमन के छेक;
मोके बल,
“मय तुचो मुक्ति देउ महापरभु आंय।”
4 जोनमन मोचो जीव धरुक मन करसोत
हुनमन लाज पड़ोत आउर हुनमन चो इजित जाओ।
जोनमन मोचो नोकसान करुक बिचारसोत,
हुनमन भक-पाड़ुन बोहड़ोत।
5 हुनमन लेहरा उड़ातो भूसा असन होओत,
जहोवा चो दूत हुनमन के कुदाओ।
6 हुनमन चो बाट ने अंधार आउर खय धरु रओ,
आउर जहोवा चो दूत हुनमन के खेदते नेओ।
7 कसनबलले फोकाहा ने हुनमन मोके धरतो काजे फांदा मंडाला;
आउर फोकाहा ने मोचो जीव धरतो काजे खोदरा खोड़ला।
8 उधापड़े हुनमन उपरे बिपती पड़ो।
आउर आपलो मंडालो फांदा ने आपने फसोत;
हुनी बिपती ने आपनेमन पड़ोत।
9 तेबे मय जहोवा किरता हरिक होयंदे
हुनचो दिलो मुक्ति ले हरिक-उदीम होयंदे।
10 मय समपुरन मन ले बलेंदे,
“ए जहोवा, तुचो कटार कोन आसे?
तुय निमलमन के
बड़े-बड़े बलेयारमन ले बचाउआस,
गरीब-दुखीमन के झीका-उड़मा करुमन ले रखेया करुआस।”
11 फंदी गवामन उबा होयसोत;
मय नी जानतो गोटमन के मोके पूछसोत।
12 मय भलई करलो पलटा हुनमन मोचो अडरा करसोत;
आउर मोचो जीव के गगायसोत।
13 मानतर हुनमन बेमार होलोदांय
मय दुख चो पोता पींदले;
आउर उपास-पियास करुन तकलीस पावले।
मय खाले मुंड करुन हुनमन काजे पारथना करले,*
14 जसन कोनी आपलो मीत नोहले भाई काजे करुआत;
जसन कोनी आपलो माय काजे गागा-बोगा होउआत,
उसनेची मय बले मुंडे हाथ देउन खिसियाले।
15 मानतर मोचो उपरे बिपती ईलो बेरा, हुनमन हरिक होउन
मोचो इजित धरतो काजे रूंडा होला;
निलज लोग जोनमन के मय जानते बले नी रले
हुनमन मोचो बिरुद गोटोक सोर होउन घन-घन मोके मार-पेट करते रला;
16 कपटीमन मोके टेचरायसोत,
आउर मोचो उपरे दात कडरेसोत।
17 ए परभु, तुय किदलदांय ले दखते रउआस?
जोन गराहां ने एमन मोके पाड़लासे, एताले मोके बचाव,
जुवान बीजापुलिया-बागमन ले मोचो जीव के बचाव!
18 खुबे बड़े मंडली ने मय तुचो धन-धन करेंदे
खुबे लोगमन चो पुरे मय तुचो जय-जय करेंदे।
19 मोचो बयरीमन के फोकाहा ने मोचो बिरुद हरिक होउक नी देस,
आउर जोन मोके फोकाहा ने घिनियायसोत हुनमन के आंईक मारुन हांसी-खेली करुक नी देस।
20 कसनबलले हुनमन अस्तिर चो गोट नी गोटेयाओत,
मानतर राज ने अस्तिर ने रतो लोग चो बिरुद
फंद उआट करते रयसोत।
21 मोचो बयरीमन मोचो बिरुद मुंड उठाउन बलला;
“हव-हव,
आमी आपलो आंईक ले दखलुसे।”
22 ए जहोवा, तुय तो दखलिसीस, ओगाय नी रा!
ए परभु, मोचो ले लापी नी रा!
23 ए मोचो महापरभु, उठ! मोचो नियाव-दाव लड़,
ए मोचो परभु, मोचो काजे लड़!
24 ए मोचो महापरभु जहोवा,
तुय आपलो धारनिक हिसाब ले मोचो सत नियाव कर,
आउर हुनमन के मोचो बिरुद हरिक होउक नी देस।
25 हुनमन आपलो मने असन बलुक नी सकोत,
“हव, आमचो मन-इछा पुरा होली।”
हुनमन असन बले बलुक नी सकोत, “आमी हुनके हरालु।”
26 जोनमन मोचो बिपती ले हरिक होयसोत,
लाज पड़ुन हुनमन चो थोतना उतरो;
जोनमन मोचो बिरुद बड़े-बड़े गोटेयायसोत,
हुनमन लाज पड़ोत आउर हुनमन चो इजित जाओ।
27 जोन मोचो भलई मन करसोत,
हुनमन हरिक-उदीम ले जय-जय करोत,
आउर सरलगा बलते रओत,
“जहोवा चो जय-जय होओ,
हुन आपलो कमेया चो भलई ले हरिक होउआय।”
28 तेबे मय तुचो धारनिक गोट सांगेंदे
आउर रात-मंजन तुचो जय-जय करेंदे।