महापरभु भलई करलो काजे हुनचो जय-जय
दाउद चो भजन-गीत: जिदलदांय दाउद अबीमेलेक चो पुरे बोया होतो सुआंग करलो, तेबे अबीमेलेक हुनके हुताले निकरातो के हुन जाते गेलो।
34
मय अमदेया जहोवा चो धन-धन करेंदे;मोचो टोंड ले सरलगा हुनचो जय-जय होते रयदे।
2 मोचो जीव जहोवा उपरे गुमान करेसे;
सोज लोग एके सुनुन हरिक होदे।
3 इआ, मोचो संगे जहोवा चो बड़ाई करा,
आमी सपाय मिसुन हुनचो नाव चो जय-जय करुं!
4 मय जहोवा के गुहारले आउर हुन मोचो सुनलो,
आउर मोचो सपाय डर ले मोके बचालो।
5 जोनमन हुनचो बाटे दखला, हुनमन हरिक जीवना पावला;
आउर हुनमन केबई लाज नी पड़दे।
6 मय गरीब-दुखी, जहोवा के हागदिले आउर हुन मोचो सुनलो
आउर मोके सपाय दुख-तकलीस ले बचालो।
7 जहोवा के डरतो लोग के,
हुनचो दूत भोंवरक ले आड़ होउन बचायसे।
8 चाकुन दखा, जहोवा कितरो भला आय!
धन-धन आय हुन मनुक, जोन हुनचो सरन ने एयसे!
9 ए जहोवा चो पवितर लोग, हुनके डरा;
कसनबलले हुनके डरतो लोग के काई उना नी होये।
10 जुवान बीजापुलिया-बागमन के खातोने उना होयसे आउर भूके बले रयसोत;
मानतर जहोवा के डगरातो लोगमन के काई नंगत तीज चो उना नी होये।
11 ए पिलामन, इआ मोचो गोट सुना,
मय तुमके जहोवा चो भक्ति करुक सिखायंदे।
12 हुन कोन मनुक आय जोन जीव रउक मन करेसे,
आउर खुबे दिन जीव रउन भलई दखुक मन करेसे?
13 आपलो जीब ले अडरा गोट,
आउर आपलो टोंड ले फंद गोट नी गोटेयाव।
14 अडरा बुता के छांडुन भलई बुता कर;
मिलुन-मिसुन अस्तिर ने रा आउर हुनी बाट ने चल।
15 जहोवा चो आंईकमन धरमकारीमन के दखते रयसे,
आउर हुनचो कानमन, हुनमन चो गुहार सुनते रयसे।
16 जहोवा, अडरा बुता करुमन† चो बिरुद करुआय
कि हुनमन चो सूरता मंजपुर ले मेटुन जाओ।
17 धरमकारीमन, जहोवा के गुहारुआत आउर हुन, हुनमन चो सुनुआय,
आउर हुनमन के सपाय बिपतीमन ले बचाउआय।
18 जहोवा, मन टुटलो लोगमन संगे रउआय,
आउर आसा नोहलो लोगमन के बचाउआय।
19 धरमकारी उपरे खुबे बिपती पड़ेसे;
मानतर जहोवा हुनके सपाय बिपतीमन ले छंडायसे।
20 हुनचो सपाय हाड़ा चो रखेया हुन करेसे;
आउर हुनचो हाड़ामन ले गोटोक के बले टुटुक† नी देये।
21 दुसट आपलो अडरा बुता किरता मोरेदे;
धरमकारी चो बयरीमन के दोसी मानदे।
22 जहोवा आपलो कमेयामन चो जीव के मोल देउन बचाउआय;
जोन बले हुनचो सरन ने आसोत, हुनमन ले कोनी बले डंड नी पावदे।