जहोवा काजे जय-जय गीत
33
ए धरमकारीमन, जहोवा किरता हरिक-उदीम होआ!कसनबलले जहोवा चो जय-जय करतोर सोज लोगमन के फोबेसे।
2 किंदरी बाजा बजाउन-बजाउन जहोवा चो जय-जय करा,
दस तार बीती सारंगी बजाउन-बजाउन हुनचो भजन गाहा!
3 हुनचो काजे नवा गीत गाहा,
नंगत ले बजाउन जोर ले हुनचो जय-जय करा।
4 कसनबलले जहोवा चो बचन चोखा आय;
आउर हुनचो सपाय बुता पतेयातो लाईक आय।
5 हुन, धारनिक आउर सत-नियाव के मन करुआय;
जहोवा चो सत-मया ले मंजपुर भोरलीसे।
6 जहोवा चो बचन ले बादरी बनली,
आउर हुता चो सपाय बानी हुनचो टोंड चो फुंडा ले बनली।
7 हुन, समदूरमन चो पानी के गोटकी लगे रूंडा करेसे;
आउर गड़िया समदूरमन के आपलो भंडार ने संगायसे।
8 मंजपुर चो सपाय लोग जहोवा के डरा;
संवसार ने रतो सपाय लोग हुनके मान करा!
9 कसनबलले जेबे हुन बललो, तेबे उसनेची होली;
जेबे हुन हुकुम दिलो, तेबे सते उसनेची होली।
10 जहोवा जात-जात चो उआट के फोकाहा करुआय;
हुन देस्-देस् चो लोगमन चो बिचारमन के नसाउआय।
11 मानतर जहोवा चो उआट अमदेया चमकट रयसे,
हुनचो मन चो बिचारमन पीड़ी-पीड़ी ले बनुन रयसे।
12 हुन जात-जात चो लोग धन-धन आत, जोनमन चो महापरभु, जहोवा आय
आउर जेके हुन, आपलो निज लोग होतो काजे बाछलोसे।
13 जहोवा सरग ले दखेसे;
हुन सपाय लोगमन के धियान ले दखेसे।
14 हुन आपलो राजगादी ने बसुन
मंजपुर ने रतो सपाय लोगमन के दखेसे,
15 हुन सपाय चो मन के घड़लोसे,
आउर हुनमन करतो सपाय बुतामन के धियान ले दखेसे।
16 राजा आपलो खुबे सेना रले बले बाचुक नी सके;
आउर बलेयार आपलो खुबे सकत ले बाचुक नी सके।
17 लड़ई ने जीततो काजे सिखालो घोड़ा उपरे भोरसा करतोर फोकाहा आय,
हुन आपलो खुबे सकत ले कोकई जीताउक नी सके।
18 दखा, जहोवा चो आंईकमन आपनेके डरतो लोगमन के धियान ले दखेसे,
आउर हुनमन के बले, जोनमन हुनचो सत-मया उपरे आसा करसोत
19 कि हुनमन चो जीव के मोरना ले बचाओ,
आउर भूक पड़लो बेरा हुनमन चो जीव के बचाओ।
20 आमचो जीव जहोवा चो बाट दखेसे;
हुन आमके साका होउ आउर आमचो ढाल आय।
21 हव, आमचो मन हुनचो किरता खुबे हरिक होयसे,
कसनबलले आमी हुनचो पवितर नाव उपरे भोरसा करुंसे।
22 ए जहोवा, जसन आमी तुचो उपरे आसा करुंसे,
उसनेची तुचो सत-मया आमचो उपरे होओ।