खेमा पावलो लोग धन-धन आत
“मसकिल दीस” ने दाउद चो भजन-गीत।
32
धन-धन आय हुन मनुक, जेचो ओधरम खेमा होली,आउर जेचो पापमन के ढाकलो।
2 धन-धन आय हुन मनुक, जेचो ओधरम चो हिसाब जहोवा नी धरे,†
आउर जेचो मने कपट नीआय।
3 जेबे मय आपलो पाप के नी मानले,
तेबे रात-मंजन कहरुन-कहरुन मोचो देहें झुलुन-आटुन गेली।
4 कसनबलले रात-मंजन मय तुचो हाथ चो डंड ले चेपाय होउन रले;
मोचो सकत, जेट बेरा चो डांगरा फाटलो भुंय असन होली। निनास
5 जेबे मय आपलो पाप तुचो पुरे मानले,
आउर आपलो ओधरम के नी लुकाले;
आउर बलले, “मय, जहोवा चो पुरे आपलो सपाय पापमन के मानेंदे।”
तेबे तुय मोचो ओधरम आउर पापमन के खेमा करलीस। निनास
6 एईकाजे सपाय भगतमन तकलीस बेरा पारथना करोत
कि तुके भेटुक सकोत;
तेबे बड़े पुर-पानी असन तकलीस ईले बले
हुन भगत लगे अमरुक नी सके।
7 तुय मोचो लुकतो ठान आस,
गराहां बेरा तुय मोचो रखेया करसे;
तुय मोचो भोंवरक छंडावा चो हरिक ले बेड़से। निनास
8 जहोवा बलेसे, “मय तुके गियान देयंदे
आउर जोन बाट ने तुके हिंडतोर आय
मय तुके लेक करुन हुन बाट के दखायंदे।
9 तुमी घोड़ा आउर गदहा असन बुद नोहलो नी होआ,
हुनमन के लगाम आउर कासरा ले आपलो हक ने करुक पड़ेसे,
नोहले हुनमन तुचो आकुस ने नी रओत।”
10 दुसटमन के खुबे दुख-तकलीस होयदे;
मानतर जहोवा उपरे भोरसा करतो लोग के जहोवा अमदेया सत-मया करेदे।
11 ए धरमकारीमन, जहोवा किरता हरिक-उदीम होआ,
आउर ए सपाय सोज लोगमन, हरिक ले जहोवा चो जय-जय करा!