महापरभु उपरे भोरसा करुन गुहार
बजनेया मुखिया काजे दाउद चो भजन-गीत
31
ए जहोवा, मय तुचो सरन ने ईलेसे;मोके केबई लाज पड़ुक नी होओ;
तुचो धारनिक हिसाब ले मोके छंडाव।
2 मोचो गुहार के कान डेरुन सुन
आउर मोके झटके छंडाव!
तुय मोके सरन देउ चमकट सिलपट,
आउर मोके बचातो भाड़ा बन!
3 हव, तुय ची मोचो सिलपट आउर भाड़ा आस;
तुचो नाव किरता मोके बाट दखाव आउर चलाव,
4 मोके धरतो काजे मंडालो फांदा ले मोके बचाव,
कसनबलले तुय ची मोचो रखेया करु भाड़ा आस।†
5 मय आपलो आत्मा के तुचो हाथे सोपुन देयंसे;†
ए जहोवा, ए सत महापरभु, तुय मोके मोल देउन छंडालिसीस।
6 मय मूरत-सेवा करुमन के घिनियाउआंय;
मानतर मय जहोवाचेई उपरे भोरसा करुआंय।
7 तुचो सत-मया किरता मय खुबे हरिक-उदीम ने आंसे,
कसनबलले तुय मोचो दुख-तकलीस के दखलीस,
आउर मोचो गराहां बेरा मोके धियान दिलीस,
8 तुय मोके बयरी चो हाथे पड़ुक नी दिलीस;
मोचो पांयमन के ओसार ठाने उबा करलिसीस।
9 ए जहोवा, मय खुबे दुख-तकलीस ने पड़लेसे, मोचो उपरे दया कर;
मोचो आंईक, जीव आउर देहें
सपाय दुखा काजे कहरेसोत।
10 दुखा काजे मोचो जीव,
आउर मय अमदेया कहरुन-कहरुन रउंसे;
ओधरम किरता मोचो सकत बले आटते जायसे,
आउर मोचो हाथ-पांय बसते जायसे।
11 मोचो बयरीमन मोके बदी देयसोत
घर लग चो लोग बले हिनस्ता करसोत,
मोचो लोग-बाग मोके डरसोत;
मोके खोरे दखुन हुनमन मोचोले लापी परायसोत।
12 मोके मोरलो लोग असन भूलकला;
मय टुटलो-फुटलो हांडी-कुंडरी असन होलेसे।
13 हव, मय खुबे लोग चो टोंड ले मोके बदी देतोके सुनलेसे
गुलाय बाटे डर चेपालीसे!
हुनमन मोचो बिरुद गोटोक-सोर होयसोत,
मोचो जीव धरतो उआट करसोत।
14 मानतर ए जहोवा, मय तुचेई उपरे भोरसा करलेसे,
मय बलले, “तुय मोचो महापरभु आस।”
15 मोचो जीव तुचो हाथे आसे;
तुय मोके मोचो बयरीमन आउर डाटा-टेवा करतोमन ले छंडाव।
16 आपलो कमेया उपरे दया कर;
आउर आपलो सत-मया ले मोके बचाव।†
17 ए जहोवा, मोके लाज पड़ुक नी देस,
कसनबलले मय तुके गुहारेंसे;
दुसट लोग लाज पड़ोत,
आउर पतालपुरे चिमनांय पड़ुन रओत।
18 फंद गोटेयातो लोगमन कोंदा होओत,
जोनमन धरमकारी लोग संगे
गुमान आउर इजित धरुन गोटेयायसोत।
19 आहा, तुचो भलई कितरो खुबे आय,
जोन तुय, तुचो भगतमन काजे संगालिसीस,
आउर सपाय लोगमन पुरे,
तुचो सरन ने ईलो लोगमन काजे भलई करुन दखालिसीस!
20 तुय हुनमन के मनुकमन चो अडरा उआटमन ले बचाउन
आपलो लगे लुकायसीस;
तुय हुनमन के सरन देउन
बदी देउमन ले बचायसीस।
21 जहोवा चो धन-धन होओ,
कसनबलले हुन मोके भाड़ा बिती सहर ने लुकाउन
मोचो उपरे आपलो अचरित सत-मया दखालो।
22 मय तो डरुन भाति बलले,
“मय जहोवा चो नंजर ले लापी होलेसे।”
तेबले बले जेबे मय तुचो पुरे गाग-गगरीही होले,
तुय मोके साका होलीस।
23 ए जहोवा चो सपाय भगतमन, हुनके मया करा!
जहोवा, सत लोगमन के रखेया करुआय,
मानतर गुमान करुमन के पलटा देउआय।
24 ए जहोवा उपरे आसा करतो लोग, ढाढ़ुस करा
आउर तुमचो मन चमकट रओ।