धन-धन करतो पारथना
मंदिर के सोपतो बेरा, दाउद चो भजन-गीत
30
ए जहोवा, मय तुके सहरायंदे, कसनबलले तुय मोके झीकुन बचालीस,आउर मोचो उपरे बयरीमन के हरिक होउक नी दिलीस।
2 ए मोचो महापरभु जहोवा, मोचो साका होतो काजे तुके गुहारले,
आउर तुय मोके उजरालीस।
3 ए जहोवा, तुय मोचो जीव के पतालपुर ले निकरालीस,
तुय मोचो जीव के बचाउन मोरलोमन थाने जाउक नी दिलीस।
4 ए जहोवा चो भगतमन, हुनचो भजन गाहा,
आउर हुनचो पवितर नाव के धन-धन करा।
5 कसनबलले हुनचो रीस डंडिक ची काजे आय,
मानतर हुनचो दया जीवता जीव भर चो आय।
राती बेरा गागा-बोगा होले बले,
बियाने हरिक मिरेदे।
6 मय मोचो अस्तिर बेरा बलुन रले,
“मय अमदेया चमकट रयंदे।”
7 ए जहोवा आपलो दया ले,
तुय मोके डोंगरी असन चमकट करलीस;
तुय आपलो थमना के मोचो बाटले लुकातोके
मय खुबे डरले।
8 ए जहोवा, मय तुकेई ची हागदिले;
आउर कलपुन भाति परभु ले असन गुहारले,
9 “मय मोरले, काय नफा होयदे?
काय, माटी तुचो जय-जय करेदे?
काय हुन, तुय पतेयातो लाईक परभु आस बलुन गुलाय बाटे सांगुक सकेदे?
10 ए जहोवा सुन, मोचो उपरे दया कर!
ए जहोवा, तुय मोके साका हो!”
11 तुय मोचो गागा-बोगा के नाचा-डगावा चो हरिक ने पलटलीस;
तुय मोचो दुख चो टाट* के हिटाउन
मोके हरिक चो कोसा-पोतिया पींदालीस।
12 एईकाजे मोचो जीव अमदेया तुचो जय-जय गीत गावते रयदे।
ए मोचो महापरभु जहोवा, मय अमदेया तुचो धन-धन करते रयंदे।