बादरी उपर ले जहोवा चो राग
दाउद चो भजन-गीत
29
ए सरगदूतमन, महापरभु चो जय-जय करा,जहोवा चो मयमा करा आउर हुनचो सकत के सहराहा।
2 जहोवा चो नाव चो मयमा करा;
पवितर आउर मयमा-मान जहोवा के डंडासरन करा।
3 जहोवा चो राग, समदूर उपरे सुना देउआय;
मयमा चो महापरभु गरजुआय,
हुन, बड़े समदूर उपरे बादरी घुड़ललो असन गरजुआय।
4 जहोवा चो राग ने खुबे सकत आसे,
जहोवा चो राग, मयमा ले भोरलीसे।
5 जहोवा चो राग ले देवदार रूकमन छिदरी-बिदरी होयसे,
जहोवा, लबानोन चो देवदार रूकमन के छिदरी-बिदरी करेसे।
6 जहोवा, लबानोन डोंगरी के बाछामन असन,
आउर सिरयोन* डोंगरी के जुवान रान-संड असन उदलाउआय।
7 जहोवा चो राग, ढग-ढकतो आईग के बिखरुआय।
8 जहोवा चो राग, छीड़ा-भाटा के हलाउआय,
जहोवा कादेस भाटा के थरथराउआय।
9 जहोवा चो राग ले चीतरमन पिला पकायसोत*,
आउर रानमन पाना झड़ाउआत;
आउर हुनचो मंदिर ने सपाय लोग मयमा गीत गाउआत।
10 जहोवा आपलो राजगादी ने बड़े जल-मंगर उपरे बसलोसे;
आउर जहोवा जुग-जुग काजे राजा आय।
11 जहोवा आपलो रयत के सकत देओ!
जहोवा आपलो रयत के अस्तिर चो बर देओ!