साका होतो काजे पारथना
दाउद चो भजन-गीत
28
ए जहोवा, मय तुके ची हागदेयंसे;ए मोचो रखेया करु महापरभु, मोचो पारथना के पाट सुना नी कर,
कसनबलले तुय ओगाय रलोने
मय मोड़ा-भाटा चो मोरलोमन असन होयंदे।
2 जिदलदांय मय तुचो पवितर मंदिर बाटे
हाथ उचाउन गुहारेंदे,
तुय मोचो गाग-गगरीही होतोके सुनुन
मोके साका हो।
3 दुसट आउर ओधरमीमन संगे
मोके नास नी कर,
जोनमन आपलो घर-लग चो लोग संगे अस्तिर चो गोट तो गोटेयायसोत,
मानतर हुनमन चो मन ने कपट आसे।
4 हुनमन चो करलो बुतामन,
आउर अडरा बुतामन हिसाब ले हुनमन के डंड देस;
हुनमन चो हाथ ले करलो बुता हिसाब ले,
हुनमन के पलटा देस।
5 हुनमन जहोवा चो बुता के,
आउर हुनचो करलो अचरित बुतामन के धियान नी करोत,
एईकाजे हुन, हुनमन के घसरायदे आउर उठुक नी देये।
6 जहोवा धन-धन आय!
कसनबलले हुन मोचो गाग-गगरीही होतोके सुनुन मोके साका होलो।
7 जहोवा मोचो सकत आउर ढाल आय;
हुनचो उपरे मय भोरसा करेंसे;
हुन मोके साका होलोसे, एईकाजे मोचो मन खुबे हरिक आसे,
मय गीत गाउन हुनचो धन-धन करेंदे।
8 जहोवा आपलो रयत चो सकत आय,
हुन आपलो बाछलो राजा के बचातो चमकट भाड़ा आय।
9 ए जहोवा, आपलो रयत के बचाव, आउर आपलो निज-लोग के बर देस;
तुय हुनमन चो धोरई हो, आउर अमदेया हुनमन के समाल।