जहोवा मोचो उजर आउर मोके मुक्ति देउ महापरभु आय
दाउद चो भजन-गीत
27
जहोवा, मोचो उजर आउर मोके मुक्ति देउ महापरभु आय;मय कोकई काय काजे डरुआंय?
जहोवा मोचो जीव चो रखेया करु भाड़ा आय;
मय कोकई काय काजे डरुआंय?
2 मोचो बिरुद अडरा बुता करतो लोगमन
मोके डाटा-टेवा करते रला,
हुनमन मोके मोरते मारतो काजे मोचो उपरे ईला,
तेबे हुनीचीमन हकनुन घसरला।
3 पलटन मोके भोंवरक छेकले बले,
मय नी डरें;
मोचो बिरुद लड़ई होले बले,
मय फिकिर नोहलोर रयंदे।
4 मय जहोवा के गोटोक बर मांगलेसे,
हुनचेई धियान ने रयंदे;
मोके जीवता जीव भर
जहोवा चो मंदिर ने रउक होओ,
कि जहोवा चो नंगत गुन के दखते रउक होओ,
आउर हुनचो मंदिर ने धियान करुक होओ।
5 कसनबलले हुन मोके बिपती बेरा
आपलो पवितर ठान ने लुकाउन संगायदे;
आउर आपलो तम्बु भीतरे मोके लुकाउन रयदे,
हुन, मोके डेंग सिलपट उपरे चेगाउन बचायदे।
6 एदांय मोचो भोंवरक रतो सपाय बयरीमन ले मोके बड़े बनालोसे;
एईकाजे मय जहोवा चो तम्बु ने
जय-जय करते जतरा करेंदे;
आउर हुनचो भजन गीत गायंदे।
7 ए जहोवा, मय तुके हागदेयंसे, मोचो गुहार सुन,
मोचो उपरे दया करुन मोके सांग!
8 तुय बललीसीस, “मोचो दरसन पावतो काजे डगराहा।”
एईकाजे मोचो मन बलेसे,
“ए जहोवा, तुचो दरसन पावतो काजे मय डगरायंसे।”
9 तुचो थमना के मोचो ले नी लुकाव।
रीस होउन तुचो कमेया के पाट नी कर,
तुय मोचो साहरा होलीसीस।
मोके मुक्ति देउ महापरभु,
मोचोले लापी नी हो आउर मोके नी छांड।
10 मोचो आया-बुआ तो मोके छांडला,
मानतर जहोवा मोके साका होयदे।
11 ए जहोवा, मोके तुचो धारनिक बाट दखाव,
आउर मोचो बयरीमन ले बचाउन
मोके सलसला बाट ने हिंडाव।
12 डाटा-टेवा करतो बीतामन चो हाथे मोके नी छांड;
कसनबलले फंदी गवामन मोचो बिरुद होलासोत,
आउर हुनमन उबढंगरी बुता करसोत।
13 हव, मय पतेयायंसे, मोचो जीव रते-रते
मय जहोवा चो भलई के दखेंदे।
14 जहोवा चो बाट दखते रा;
ढाढ़ुस कर आउर तुचो मन चमकट रओ;
हव, जहोवाचेई बाट दखते रा!