चोखा मनुक चो पारथना
दाउद चो भजन-गीत
26
ए जहोवा, मोचो नियाव कर,कसनबलले मय आगतले चोखा ले चलेंसे,
आउर मोचो भोरसा जहोवा उपरे चमकट आसे।
2 ए जहोवा, मोके जांच आउर परख;
मोचो मन आउर बिचार के परखुन दख।
3 कसनबलले मय तुचो सत-मया के जानेंसे,
आउर मय तुचो सत बाट ने चलेंसे।
4 मय फंदी लोगमन संगे नी बसें,
आउर कपटीमन संगे कहांय नी जायें;
5 मोके अडरा लोगमन संगे रउक नी भाये,
आउर दुसटमन संगे नी बसें।
6 ए जहोवा, मय आपलो हाथमन के सुद पानी ले धोयंसे, कसनबलले मय दोख नोहलो आंय,
आउर तुचो बेदी लगे एउन आराधना करेंसे,
7 मय जोर ले तुचो धन-धन गीत गायंसे,
आउर तुचो सपाय अचरित बुतामन के गोटोक-गोटोक करुन सांगेंसे।
8 ए जहोवा, तुचो पवितर ठान
आउर तुचो मयमा चो डेरा मोके नंगत लागेसे।
9 मोचो जीव के पापीमन संगे
आउर माने-मारा लोगमन संगे नास नी कर,
10 हुनमन तो अडरा बुतामन करतोने भिड़ुन रयसोत,
आउर घूस* ले हुनमन चो उजा हाथ भोरलीसे।
11 मानतर मय तो चोखा ले चलते रयंसे;
तुय मोके छंडाव आउर मोचो उपरे दया कर।
12 मोचो पांय सम भुंय ने चमकट आसे;
मय मंडलीमन ने जहोवा चो धन-धन करेंदे।