बाट दखातो काजे आउर रखेया काजे पारथना
दाउद चो भजन-गीत
25
ए जहोवा, मय आपलो मन तुचो बाटे लगायंसे।2 ए मोचो महापरभु, मय तुचेई उपरे भोरसा करेंसे,
मोके लाज पड़ुक नी देस;
मोचो बयरीमन के मोचो ले जीतुक नी देस।
3 हव, जोन लोग तुचो बाट दखसोत, हुनमन लाज नी पड़दे;
मानतर दोख नोहलो लोग के बदी देउमन लाज पड़दे।
4 ए जहोवा, तुचो धारनिक बाट मोके दखाव,
मोके हुन बाट ने हिंडुक सिखाव।
5 मोके आपलो सत बाट ने चलाव आउर सिखाव,
कसनबलले तुय मोके मुक्ति देउ महापरभु आस।
मय रात-मंजन तुचेई बाट दखते रयंसे।
6 ए जहोवा, तुचो दया आउर सत-मया के सूरता कर,
जोन तुय आगे जुगे ले करसीस।
7 ए जहोवा, मोचो जुवान बेरा करलो पापमन आउर मोचो ओधरम के सूरता नी कर;
मानतर तुचो दया किरता सत-मया ले मोके सूरता कर।
8 जहोवा भला आउर सोज आय;
एईकाजे हुन पापीमन के सत बाट दखायसे।
9 हुन सोज लोगमन के सत बाट चो बारे ने सिखायसे,
हुनमन के आपलो बाट ने हिंडायसे।
10 जोनमन जहोवा चो बायदा आउर चेतानीमन के मानसोत,
हुनमन काजे हुनचो सपाय बाट, सत-मया आउर पतेयातो लाईक आय।
11 ए जहोवा, तुचो नाव किरता,
मोचो खुबे ओधरम के खेमा कर।
12 जहोवा चो भगतमन कोन आत?
जहोवा हुनके हुनी बाट दखायदे जोन बाट ने हुनके हिंडतोर आय।
13 हुन हरिक-उदीम ने रयदे,
आउर हुनचो थर मंजपुर चो हकदार होदे।
14 जहोवा चो भगतमन ची हुनचो भेद के जानुक सकदे,
आउर हुन आपलो बायदा हुनमन के सांगेदे।
15 मय आपलो आंईकमन ले अमदेया जहोवा चो बाट दखते रयंसे,
कसनबलले हुनी मोचो पांयमन के फांदा ले छंडायदे।
16 ए जहोवा, मोचो बाटे दखुन दया कर;
कसनबलले मय एकलाय आउर दुखी आंसे।
17 मोचो जीव खुबे तकलीस ले तायना-बायना होयसे,
तुय मोके सपाय डंडमन ले छंडाव।
18 तुय मोचो सपाय दुख-डंड के दख,
आउर मोचो सपाय पापमन के खेमा कर।
19 दख, मोचो बयरीमन खुबे होलासोत,
आउर मोके खुबे बईर करसोत।
20 मोचो जीव चो रखेया कर आउर मोके छंडाव,
मोके लाज पड़ुक नी देस कसनबलले मय तुचो सरन ने आंसे।
21 तुचो धारनिक आउर सोज ले मोके रखेया कर,
कसनबलले मोके तुचो उपरे भोरसा आसे।
22 ए महापरभु, इसराएल के,
हुनचो सपाय बिपतीमन ले छंडाव।