मयमा-मान राजा
दाउद चो भजन-गीत
24
मंजपुर आउर हुता रतो सपाय,संवसार आउर हुता रतो सपाय लोग जहोवाचेई आत।
2 कसनबलले हुनी, मंजपुर चो पाया समदूरमन उपरे मंडालोसे,
आउर नंदीमन उपरे हुनके चमकट करलोसे।
3 जहोवा चो डोंगरी उपरे कोन चेगुक सकेदे?
हुता, हुनचो पवितर ठान ने कोन उबा होउक सकेदे?
4 जेचो हाथ चो बुता दोख नोहलोर आउर मन सुद आसे,
जोन आपलो मन के फोकाहा गोटमन ने नी लगालोसे,
आउर फंद किरिया नी खादलोसे।
5 हुन जहोवा ले बर पायदे,
आउर आपलो मुक्ति करु महापरभु हुनके धरमी मानेदे।
6 असनी ची लोग हुनके डगरायसोत,
हुनमन ची जाकूब चो महापरभु चो दरसन पाउक मन करसोत। निनास
7 ए देवड़ीमन*, डेंग होआ,
ए आगे जुगे चो डेवनामन, उगाड़ी होआ
कि मयमा-मान राजा ओलो।
8 हुन मयमा-मान राजा कोन आय?
जहोवा ची, हुन सकत आउर माहान राजा आय।
जहोवा चे लड़ई ने बड़े बीर आय।
9 ए देवड़ीमन, डेंग होआ,
ए आगे जुगे चो डेवनामन, उगाड़ी होआ
कि मयमा-मान राजा ओलो।
10 हुन मयमा-मान राजा कोन आय?
सेनामन चो जहोवा, हुनी मयमा-मान राजा आय। निनास