दुख-तकलीस बेरा महापरभु के हागदेतोर
बजनेया मुखिया काजे “अभलेरसर* दीस” ने दाउद चो भजन-गीत
22
ए मोचो महापरभु, ए मोचो महापरभु, तुय मोके काय काजे छांडलीस?तुय काय काजे मोचो हागदेतोके आउर मोके साका होतो ले लापी रयसीस?
2 ए मोचो महापरभु, मय तुके मंजन ने हागदिले, मानतर तुय उत्तर नी दिलीस;
तुके राती बेरा बले हागदिले, मानतर मोके अस्तिर नी मिरली।
3 तेबले बले ए महापरभु, तुय पवितर आस,
तुय राजगादी ने बसलिसीस आउर इसराएल तुचो जय-जय करेसे।
4 आमचो पुरखा-पाटी तुचो उपरे भोरसा करला;
हुनमन भोरसा करला आउर तुय हुनमन के छंडालीस।
5 हुनमन तुके गुहारला आउर तुय हुनमन के बचालीस;
हुनमन तुचो उपरे भोरसा करला आउर केबई लाज नी पड़ला।
6 मानतर मय तो मनुक नोआंय, गोटोक कीड़ा असन आंय;
सपाय मोके घिनियाउआत, आउर मोचो इजित धरुआत
7 मोके दखतो सपाय लोग मोके हांसुन पकायसोत;
हुनमन आपलो टोंड अलटते, मुंड हलाते असन बलसोत:
8 “ए मनुक जहोवा उपरे भोरसा करेसे, हुनी हुनके छंडाओ,
महापरभु हुनचो ले हरिक आसे एईकाजे हुनी हुनके बचाओ।”
9 मानतर तुय ची मोके आया चो पेट ले निकरालीस;
गोरस खातो पिला रलोदांय ले ची तुय मोके भोरसा करुक सिखालीस।
10 मोके जनमते खन तुचेई हाथे सोपुन दिला,
आया चो पेट ले ची तुय मोचो महापरभु आस।
11 मोचो ले लापी नी रा, कसनबलले दुख-तकलीस एयसे,
आउर मोके साका होतो लोग कोनी नीआत।
12 खुबे संडमन मोके बेड़लासे,
बासान* चो खुबे जुवान संडमन मोके भोंवरक छेकलासे।
13 चीरुन खातो आउर नांदतो बीजापुलिया-बाग असन,
हुनमन मोचो बाटे टोंड-फाड़लासे।
14 मोचो जीव पानी असन बोहलीसे,
मोचो हाड़ामन आपलो ठान ले सरकलीसे:
मोचो मन मोमबती असन,
मोचो भीतरे उतली।
15 सुकलो खिपरा असन मोचो सकत सुकली,
मोचो जीब तारु ने लटकली;
आउर तुय मोके मारुन माटी ने मिसायसीस।
16 कसनबलले कुकुरमन मोके बेड़लासे,
आउर दुसटमन चो गोहड़ी मोके भोंवरक छेकलासे,
आउर हुनमन मोचो हाथ-पांयमन के भेदलासे।
17 मय आपलो सपाय हाड़ामन के गनुक सकें,
हुनमन मोके गरेया-गरेया दखुन दात कडरेसोत।
18 मोचो फटई के हुनमन बाटा करसोत,
आउर मोचो कुड़ता काजे चिटी पकायसोत।
19 ए जहोवा, तुय लापी नी रा;
ए मोचो महापरभु, तुय मोचो सकत आस, मोके साका होतो काजे झटके आव!
20 मोचो जीव के खांडा ले बचाव,
आउर मोचो जीव के कुकुरमन ले बचाव!
21 मोके बीजापुलिया-बाग चो टोंड ले छंडाव!
हव, रान-संडमन चो सींगमन ले तुय मोके बचालीसीस।
22 मय आपलो भाईमन पुरे तुचो नाव के सहरायंदे;
मंडली चो मंजी मय तुचो जय-जय करेंदे।
23 ए जहोवा चो भगतमन, हुनचो जय-जय करा।
ए जाकूब चो थर, तुमी सपाय हुनचो मयमा करा।
ए इसराएल चो थर, तुमी हुनके डरुन मान करा।
24 कसनबलले जहोवा, तकलीस ने रलो लोग के हिनस्ता नी करे
आउर हुनमन के नी घिनियाये;
जेबे मय हुनके गुहारले तेबे हुन पाट नी करलो,
मानतर मोचो सुनलो।
25 तुय भलई करलो किरता मय बड़े मंडली ने, तुचो जय-जय करेंदे;
तुचो भगतमन चो पुरे मय आपलो बोदना के पूरा करेंदे।
26 गरीब-दुखीमन आपलो खादी-पीदी ले हरिक होदे।
जहोवा के डगरातो लोगमन, हुनचो जय-जय करदे।
हुनमन चो जीव अमदेया अस्तिर ने रयदे!
27 मंजपुर चो सपाय लोग जहोवा के सूरता करदे, आउर हुनचो बाटे मन बोहड़ादे;
आउर जात-जात चो सपाय कुटुम हुनचो पुरे डंडासरन करदे।
28 कसनबलले जहोवा ची राजा आय,
आउर हुनी ची सपाय जात-जात चो लोग उपरे राज करुआय।
29 मंजपुर चो सपाय खातो-पीवतो बरसक लोगमन हुनचो पुरे डंडासरन करदे;
नास होतो आउर माटी ने मिसुन जातो,
सपाय लोग हुनचेई पुरे मांडी-खुटा देदे।
30 गोटोक बंस हुनचो आराधना करेदे;
आउर एतो पीड़ीमन के बले परभु चो बारे ने सांगेदे,
31 आउर नी जनमलो थर बले हुनचो धरम बुता चो बारे ने जानदे,
आउर हुनमन बले महापरभु करलो अचरित बुतामन चो बारे ने सुनदे।