जीतलो काजे जय-जय गीत
बजनेया मुखिया काजे दाउद चो भजन-गीत
21
ए जहोवा, तुचो सकत ले राजा हरिक होयसे;आउर तुय हुनके बचालो किरता हुन खुबे हरिक-उदीम होयसे!
2 तुय हुनचो मन-इछा के पूरा करलीस,
आउर हुनचो गुहार सुनलीस। निनास
3 कसनबलले तुय हुनके भेटुन नंगत-नंगत बरमन देयसीस;
आउर हुनचो मुंडे सोन चो मुकुट पिंदायसीस।
4 हुन तुके जीव मांगलो; तुय हुनके जीव दिलीस,
हुनके जुग-जुग चो जीव दिलीस।
5 तुय हुनके बचालो किरता हुनचो खुबे बड़ाई होयसे;
तुय हुनके मान आउर मयमा दिलीस।
6 हव, तुय हुनके अमदेया काजे बर दिलीसीस;
तुय हुनके खुबे हरिक-उदीम देयसीस।
7 कसनबलले राजा, जहोवा उपरे भोरसा करुआय;
आउर सबुले बड़े महापरभु चो सत-मया किरता हुन चमकट रउआय।
8 तुचो हाथ तुचो सपाय बयरीमन के खोजेदे;
तुचो उजा हाथ तुचो सपाय बयरीमन के धरेदे।
9 तुचो एतोदांय
तुय हुनमन के आईग चो भाटी असन जरासे।
जहोवा आपलो रीस ले हुनमन के गिरेदे;
आउर आईग ले हुनमन के लाकड़ी उलटायदे।
10 तुय हुनमन चो थर के मंजपुर ले,
आउर हुनमन चो बंस के मनुकमन ले नास करसे।
11 हुनमन, तुचो नोकसान करतो बिचार
आउर तुचो बिरुद करलो अडरा उआट के पूरा करुक नी सकदे।
12 कसनबलले तुय आपलो धनु-कांड हुनमन चो बिरुद झोकेयासे;
आउर हुनमन पाट करुन परादे।
13 ए जहोवा, तुय आपलो सकत ले माहान हो!
तुय जीतलो काजे आमी जय-जय गीत गाउंदे।