बयरीमन ले जीततो काजे पारथना
बजनेया मुखिया काजे दाउद चो भजन-गीत
20
ए राजा, बिपती बेरा जहोवा तुचो गुहार सुनो!जाकूब चो महापरभु जहोवा तुके जीताओ!
2 हुन आपलो पवितर ठान ले तुके साका होओ,
सियोन* ले तुके साहरा देओ!
3 हुन तुचो चेगालो सपाय भेंटमन के सूरता करो,
आउर तुचो सपाय होम-जतरा* के पाओ! निनास
4 हुन तुचो मन-इछा के पूरा करो,
आउर तुचो सपाय उआटमन के पूरा करो!
5 तेबे तुय जीतलो किरता आमी हरिक होउन बड़े राग ले गाउंदे,
आउर आमचो महापरभु चो नाव चो मयमा करुंदे।
तुय जोन बले बर मांगसे, हुन सपाय जहोवा तुके देओ!
6 एदांय मय जानले, जहोवा आपलो अबिसेक करलो राजा के बचाउआय;
मुक्ति देउ महापरभु आपलो उजा हाथ चो सकत ले
पवितर सरग ले सुनुन हुनके साका होयदे।
7 कोनी रथमन उपरे आउर कोनी घोड़ामन उपरे भोरसा करसोत;
मानतर आमी आमचो महापरभु जहोवा उपरे भोरसा करुंसे।
8 हुनमन हारदे आउर सत्यानास होदे,
मानतर आमी जीतुंदे आउर चमकट रउंदे।
9 ए जहोवा, राजा के बचाव;
आमचो गुहारलोदांय आमके उत्तर देस।