महापरभु आपलो मयमा दखातोर
बजनेया मुखिया काजे दाउद चो भजन-गीत
19
उपरपुर, महापरभु चो मयमा के सांगेसे;आउर बादरी हुनचो कारिगिरी दखायसे।
2 दिन, दिन के हुनचो बारे ने सांगेसे,
आउर रात, रात के हुनचो गियान देयसे।
3 काई भासा-बोली नीआय;
काई राग बले कहांय सुना नी देये;
4 तेबले बले बादरी चो राग गुलाय मंजपुर ने सुना देयसे,
आउर हुनचो गोट संवसार चो कोना-कोना ने अमरलीसे।
बादरी ने बेर काजे हुन गोटोक माहाल बनालोसे,
5 हुन, दुला असन आपलो माहाल ले निकरेसे,
आउर बलेयार असन आपलो दउड़ के हरिक ले पूरा करेसे।
6 हुन बादरी चो गोटोक कोना ले निकरुन
दुसर कोना अमरतले जायसे;
आउर हुनचो घाम-तप ले कोनी लुकुक नी सके।
7 जहोवा चो नियम-कानुन चोखा आय,
हुन जीव के बचायसे;
जहोवा चो सिखिया पतेयातो लाईक आय,
हुन भकवामन के बले बुदंती बनायसे;
8 जहोवा चो नियम सत आय,
हुन, मन के हरिक करेसे;
जहोवा चो हुकुम सरसरा आय,
हुन आमके नंगत बाट दखायसे;
9 जहोवा चो भक्ति करतोर पवितर आय,
हुन जुग-जुग चमकट रउआय;
जहोवा चो नीती-नियम पतेयातो लाईक
आउर धारनिक आय।
10 हुन सोन आउर निरवा सोन ले बले
आगर मन भावतो लाईक आय;
हुन ओंडार-पोरी ले थिपतो
ओंडार तेल ले बले आगर मीठ आय।
11 हुनी नियममन, तुचो कमेया के चेतानी देयसे;
हुनके मानले खुबे नफा होयसे।
12 आपलो धोका ले करलो पापमन के कोन जानुक सके?
एईकाजे ए जहोवा, मय धोका ने करलो पापमन के तुय खेमा कर।
13 तुय आपलो कमेया के निलज पाप करतो ले बचाव;
आउर पापमन के मोचो उपरे राज करुक नी देस!
तेबे मय दोख नोहलो होयंदे,
आउर बड़े-बड़े पापमन ले बले बाचुन रयंदे।
14 मोचो टोंड चो गोट आउर मन चो बिचार
तुचो मन-इछा असन होओ,
ए जहोवा, तुय मोचो चमकट सिलपट आउर मोके छंडाउ आस।