बयरीमन ले बाचलो पाछे दाउद गावलो गीत
बजनेया मुखिया काजे जहोवा चो कमेया दाउद चो गीत। जिदलदांय जहोवा हुनके सपाय बयरीमन ले आउर साउल राजा ले बचालो, हुदलदांय हुन, जहोवा काजे ए भजन-गीत गावलो।
18
ए मोके सकत देउ जहोवा, मय तुके मया करेंसे।2 जहोवा मोचो चमकट सिलपट आय, हुन मोचो रखेया करतो भाड़ा आय आउर मोचो छंडाउ परभु आय,
मोचो महापरभु, मोचो बरसक आड़ आय, मय हुनचो सरन ने आंसे,
हुन मोचो ढाल, मोचो मुक्ति चो सींग आउर मोचो लुकतो ठान आय।
3 जहोवा जय-जय करतो लाईक आय, हुनके मय हागदिले,
आउर हुन मोके मोचो बयरीमन ले बचालोसे।
4 मोरना चो डोरीमन मोके भोंवरक बेड़ु रला,
आउर ओधरम चो पुर ने मय बुड़ून मोरेंसे;
5 पतालपुर चो डोरीमन मोके भोंवरक बेड़ु रला,
मोचो काजे मोरना चो फांदा मंडाउ रला।
6 गराहां ने पड़लो बेरा मय, जहोवा के हागदिले;
मय आपलो महापरभु ले गुहारले।
मोचो पारथना हुनचो कान ने अमरली,
हुन आपलो पवितर ठान ले मोचो गुहार सुनलो।
7 हुनचो खुबे रीस ले,
मंजपुर हलली आउर थरथरली;
आउर डोंगरीमन, पाया हललोके भोसड़ली।
8 हुनचो नाकमन ले कुमला निकरली,
हुनचो टोंड ले आईग निकरुन लाकड़ी उलटाली;
आउर हुनचोले इंगरा रग-रगली।
9 हुन, सरग के लोआउन उतरलो;
हुनचो पांय खाले भींग अंधार रये।
10 हुन, करूब ने चेगुन उड़लो;
लेहरा चो पाटकीमन ले जोर ने उड़लो।
11 हुन, अंधार के आपलो आड़ बनालोसे,
आउर आपलो भोंवरक पानी ले भोरलो बादरी चो मांडो बनालोसे।
12 महापरभु चो बरतो उजर ले
करा आउर इंगरा
बादरी के चीरुन घसरली।
13 बादरी घुड़लाउन
करा आउर इंगरा घसरलोदांय सबुले बड़े महापरभु आपलो राग सुनालो,
14 हुन आपलो कांड बिंदुन-बिंदुन बयरीमन के छिदरी-बिदरी करलो;
आउर हुनमन उपरे बीच पड़ाउन-पड़ाउन हरालो।
15 ए जहोवा, तुय घुड़लालोके,
आउर तुचो नाक चो फुंडा ले,
संवसार चो पाया दखा दिली,
आउर पानी-पजरामन फुटली।
16 हुन, उपर ले हाथ लमाउन मोके धरलो,
आउर गड़िया पानी ले मोके निकरालो।
17 हुन, मोके बयरीमन चो सकत ले,
आउर मोके घिनियातो लोग ले बचालो;
कसनबलले हुनमन मोचोले खुबे आगर सकत बीतामन रओत।
18 मय गराहां ने पड़लो बेरा हुनमन मोचो उपरे ईला;
मानतर जहोवा मोके साका होलो।
19 जहोवा मोचो ले हरिक रये गुने मोके छंडालो;
आउर हुन मोके अस्तिर चो ठान ने अमरालो।
20 जहोवा मोके दोख नोहलोर दखुन
मोचो धरम बुता हिसाब ले मोके पलटा दिलो।
21 मय जहोवा चो धारनिक बाट ने चलते रले,
आउर दुसट बुता नी करले गुने, महापरभु ले लापी नी होले।
22 कसनबलले मय हुनचो सपाय हुकुममन के मानते रयें,
आउर हुनचो नीतीमन के केबई नी छांडले।
23 मय हुनचो पुरे सोज रले,
आउर काई ओधरम नी करले।
24 एईकाजे जहोवा मोके दोख नोहलोर दखुन
मोचो धरम बुता हिसाब ले मोके पलटा दिलो।
25 सत-मया करतो लोग के तुय सत-मया करसीस;
आउर सोज लोग संगे सोज बेबार करसीस।
26 कपट नोहलो लोग संगे तुय नंगत बेबार करसीस;
आउर एड़जामन संगे हुनीमन चो असन बेबार करसीस।
27 कसनबलले तुय डाटा-टेवा होलो लोगमन के बचाउआस;
मानतर गुमानी लोगमन के खाले घसराउआस।
28 हव, तुय ची मोचो काजे दीया बारुआस,
मोचो महापरभु जहोवा, मोचो अंधार के उजर करुआय।
29 तुचो साहरा ले मय पलटनमन संगे लड़ुक सकें;
आउर मोचो महापरभु चो सकत ले मय भाड़ा के नाहकुक सकें।
30 महापरभु चो बाट धारनिक आय;
जहोवा चो बचन सत आय;
हुन आपलो सरन ने ईलो सपाय लोग काजे रखेया चो ढाल आय।
31 काय, जहोवा के छांडुन कोनी आउर महापरभु आसे?
काय, आमचो महापरभु के छांडुन आउर कोनी चमकट सिलपट आसे?
32 ए हुनी महापरभु आय जोन आपलो सकत ले मोके चमकट करलोसे,
आउर मोचो बाट के सरसरा करलोसे।
33 हुनी मोचो पांयमन के चीतर चो पांयमन असन बनायसे,
आउर मोके डेंग ठानमन ने उबायसे।
34 हुन मोचो हाथमन के जुद करुक सिखायसे,
एईकाजे मोचो हाथमन ले पीतल चो धनु के झोकेयाउक सकेंसे।
35 तुय मोके रखेया चो ढाल दिलीसीस,
आपलो उजा हाथ ले मोके थामलिसीस,
आउर तुचो साका किरता मोके खुबे मान मिरेसे।
36 तुय मोचो पांय काजे सरसरा ठान बनालीस
आउर मोचो पांय नी फिसलली।
37 मय आपलो बयरीमन के खेदुन धरले;
आउर हुनमन के मोरते मारलोर नोहलोर नी बोहड़ले।
38 मय हुनमन के असन भुसले कि हुनमन उठुक नी सकला,
हुनमन मोचो पांय लगे घसरला*।
39 कसनबलले तुय जुद काजे मोचो करांड ने सकत चो पटा बांधलिसीस;
आउर मोचो बयरीमन के मोचो हक ने करलिसीस।
40 तुय मोचो बयरीमन के मोचो बाटे पाट करालिसीस
कि मोके बईर करतो लोग के मोरते मारुक होओ।
41 हुनमन साका काजे गुहारला, मानतर हुनमन के कोनी नी बचाला,
हुनमन जहोवा के गुहारला, मानतर जहोवा बले हुनमन के काई उत्तर नी दिलो।
42 तेबे मय हुनमन के लेहरा ने उड़तो धुरला असन गुंडगुंडा होओतले पेटले;
मय हुनमन के गांव-खोर चो चिकल असन बाहरे पकाले।
43 तुय मोके लोगमन चो झगड़ा ले बचालीस;
तुय मोके जात-जात चो मुखिया बनालीस;
जोन लोगमन के मय जानते बले नी रयें हुनमन मोचो सेवा करला।
44 मय बलते खन हुनमन मोचो हुकुम के मानसोत;
परदेसियामन मोचो हक ने होयसोत।
45 परदेसियामन मुरुसनाय होला,
आउर आपलो लुकलो ठानमन ले थरथरते निकरला।
46 जहोवा जीवता आय, मोचो चमकट सिलपट धन-धन आय,
मोके मुक्ति देउ महापरभु चो जय-जय होओ,
47 मोचो काजे पलटा धरतो महापरभु धन-धन आय
आउर हुन जात-जात चो लोगमन के मोचो हक ने करलोसे;
48 हुन मोके, मोचो बयरीमन ले छंडालोसे;
हव, तुय मोके, मोचो बयरीमन ले बड़े बनायसीस;
आउर उबढंगरीमन ले बचायसीस।
49 एईकाजे ए जहोवा, मय जात-जात चो लोग पुरे तुके धन-धन करेंदे।
आउर तुचो नाव चो जय-जय गीत गायंदे।
50 हुन आपलो बाछलो राजा आउर अबिसेक करलो दाउद के जीतायसे,
आउर हुनचो थर-लर के अमदेया सत-मया करेसे।