डाटा-टेवा करुमन ले बचातो काजे पारथना
दाउद चो पारथना
17
ए जहोवा, सत-नियाव काजे मोचो हागदेतो के सुन!मोचो टोंड ले निकरतो कपट नोहलो पारथना के तुय कान डेरुन सुन!
2 तुय सत के जानीस!
एईकाजे मोचो नियाव-दाव चो फासला तुय ची कर!
3 तुय मोचो मन के जानीस, राती बेरा बले तुय मोके परखलिसीस,
तुय मोके परखुन मोचो ने काई दोख नी पावलीस;
मय पक्का जाने: मोचो टोंड ले काई अडरा गोट नी निकरे।
4 तुचो बचन के मानतो किरता
उबढंगरीमन असन चलनी-बुलनी ले मय आपने के बचाउन रले।
5 मय तुचो बाट ने नंगत ले हिंडले,
मोचो पांयमन केबई नी फिसलली।
6 ए महापरभु, मय पारथना करेंसे, मय जानेंसे तुय उत्तर देउआस;
कान लगाउन मोचो गुहार सुन।
7 तुचो सरन ने ईलो लोगमन के आपलो खुबे सकत ले,
हुनमन चो बयरीमन ले बचाउन
तुय आपलो सत-मया दखाव।
8-9 मोके डाटा-टेवा करतो दुसटमन ले,
तुय आपलो आंईक चो पुतरा असन मोचो रखेया कर;
मोचो जीव धरतो काजे भोंवरक बेड़लो लोग ले,
तुय आपलो पाटकी आड़े मोके लुकाउन रा।
10 हुनमन आपलो मन के कटुर करलासोत;
आउर आपलो टोंड ले गुमानी गोटमन गोटेयायसोत।
11 हुनमन भोंवरक रउन मोके भुंये कचाड़तो काजे घत ने आसोत;
हुनमन मोचो पाट के नी छांडोत।
12 हुनमन, बीजापुलिया-बाग असन मारुन खातो काजे टाकुन रयसोत,
आउर जुवान बीजापुलिया-बाग असन घत ने रयसोत।
13 ए जहोवा, उठ, हुनमन के लड़ आउर आपट!
आपलो खांडा ले मोचो जीव के दुसटमन ले बचाव,
14 ए जहोवा, आपलो हाथ चो सकत ले,
मोके ए संवसार चो माने-मारामन ले बचाव।
हुनमन चो पेट तुय आपलो गदेया ले भरसीस;
हुनमन खुबे पिला-झीलामन ले हरिक आसोत;
आउर आपलो धन-माल के पिला-झीलामन काजे छांडुन जायसोत। *
15 मानतर मय धारनिक होउन तुचो थमना के दखेंदे;
जेबे मय चेतेंदे, तेबे तुचो दरसन पाउन अस्तिर होयंदे।