महापरभु उपरे भोरसा
बजनेया मुखिया काजे दाउद चो भजन-गीत
11
मय जहोवाचेई सरन ने आंसे;फेर तुमी कसन ने मोके बलुक सकास,
“चड़ई असन आपलो डोंगरी ने उड़ुन जा!
2 कसनबलले दखा, दुसट लोग आपलो धनु के झोकेयायसोत,
आउर आपलो धनु-कांड ले सोरिक दखसोत
कि सोज लोगमन के अंधारे बिंदोत;
3 नियम-कानुनमन* के नी मानसोत जाले,
धरमी मनुक काय करुक सके?”
4 मानतर जहोवा आपलो पवितर मंदिर ने आसे,
जहोवा चो आसनगादी सरग ने आसे;
हुन सपाय लोगमन के नंजराते रयसे आउर सपाय के परखेसे।
5 जहोवा धरमकारी आउर दुसटमन के परखुआय,
दुसट आउर झगड़ाहामन के घिनियाउआय।
6 हुन, दुसट लोगमन उपरे इंगरा आउर गंधक रिकायदे;
हुनमन के तोपलो-तोपलो लेहरा चो बाटा मिरेदे।
7 कसनबलले जहोवा धरमी आय; हुन, धरम बुतामन ले ची हरिक होउआय;
हुन, धरमकारीमन के आपलो लगे आनेदे आउर हुनमन हुनके दखदे।