सत नियाव काजे पारथना
10
ए जहोवा, तुय काय काजे मोचोले लापी रयसीस?आउर बिपती बेरा काय काजे नी दखा देयसीस?
2 दुसटमन आपलो गुमान किरता, निमल लोगमन के कुदायसोत;
हुनमन आपलेई बनालो उआटमन ने आपने फसोत।
3 दुसटमन आपलो लालच ने गुमान करसोत,
हुनमन जहोवा के छांडुन देयसोत आउर बदी देयसोत।
4 दुसटमन खुबे गुमान किरता बलसोत, “महापरभु नीआय ची”;
आउर बिचारसोत, “कोनी हिसाब बले नी धरोत।”
5 दुसटमन चो उआटमन पुरा होयसे;
हुनमन मुरे नी बिचारोत कि तुय हुनमन चो नियाव करसे;
हुनमन आपलो सपाय बयरीमन के घिनियायसोत।
6 हुनमन आपलो मने बलुआत “आमके काई नी होये;
आमी केबई बिपती ने नी पड़ुं।”
7 हुनमन चो टोंडे सराप, कपट आउर धमकातो गोटमन भोरलीसे;
हुनमन चो जीब खाले दुसट आउर दुसर के बदी देतो गोटमन आसे।
8 हुनमन, गांवमन ने लोग चो घत ने रयसोत;
छीड़ा ठान ने दोख नोहलो लोग के मोरते मारसोत।
हुनमन चो आंईकमन निमल लोग के टाकु रयसे;
9 लाटा-बुटा ने लुकलो बीजापुलिया-बाग असन,
हुनमन गरीब-दुखीमन के धरतो काजे टाकुन रयसोत,
आउर हुनमन के आपलो जाल ने फसाउन ओड़गोड़ते आनेसोत।
10 हुनमन लुकुन बसु रउआत
आउर निमल लोग, हुनमन चो सकत हाथे पड़ुन चीरी-चपट होयसोत।
11 हुनमन आपलो मने बिचारसोत, “महापरभु भुलकलो,
हुन, आपलो थमना के लुकालो आउर केबई नी दखे।”
12 ए जहोवा, ए महापरभु उठ,
दुसट लोगमन के नास कर आउर गरीब-दुखी के साहरा कर।
13 दुसटमन कसन ने महापरभु के हेला समजसोत?
हुनमन आपलो मने कसन ने बिचारसोत, “महापरभु नियाव नी करे”?
14 मानतर तुय, उबढंगरी आउर उबागरीमन के दखलिसीस,
आउर हुनमन के पलटा देउक सकीस;
निमल लोग आपने के तुचो हाथे सोपसोत;
पोरटा-पोसरमन चो साहरा तुय ची होयसीस।
15 दुसटमन चो सकत के नास कर;
आउर हुनमन ले दुसट बुता चो हिसाब धर।
16 जहोवा, जुग-जुग चो राजा आय;
बिजातीमन हुनचो राज ले नास होदे।
17 ए जहोवा, तुय नानागती लोगमन चो गुहार सुनलिसीस;
तुय हुनमन के कान देउन सुनसे आउर हुनमन चो मन के चमकट करसे।
18 कि पोरटा-पोसर आउर नानागती लोग चो सत-नियाव होओ,
तेबे माटी ले बनालो मनुकमन फेर दुसर के डराउक नी सकोत।