महापरभु सत नियाव करलो किरता जय-जय चो भजन गीत
बजनेया मुखिया काजे “मुतलबेन दीस” ने दाउद चो भजन-गीत
9
ए जहोवा महापरभु, मय समपुरन मन ले तुचो धन-धन करेंदे;तुचो करलो सपाय अचरित बुतामन के मय सांगेंदे।
2 तुचो किरता मय हरिक-उदीम होयंदे:
ए सबुले बड़े महापरभु, मय तुचो नाव चो भजन गीत गायंदे।
3 जेबे मोचो बयरीमन पाट करुन परायसोत,
तेबे हुनमन तुचो पुरे हकनुन घसरुन नास होयसोत।
4 तुय आसनगादी ने बसुन सत-नियाव करलीस;
तुय खुदे मोचो नियाव-दाव करुन दोख नोहलो मानलीस।
5 तुचो बिरुद करतो जात-जात चो लोग के तुय घुड़कलीस, आउर दुसटमन के नास करलीस,
तुय अमदेया काजे हुनमन चो नाव मेटाउन दिलीस।
6 बयरीमन मोरला आउर अमदेया काजे सत्यानास होला:
हुनमन चो काई हजम-पता बले नीआय; हुनमन चो सहरमन के तुय भोसड़ालीस।
7 मानतर जहोवा अमदेया काजे राज करेसे:
आउर नियाव करतो काजे आपलो आसनगादी के तियार करलोसे।
8 हुन खुदे संवसार चो सत-नियाव करेदे,
आउर जात-जात चो लोगमन चो नियाव धरम ले करेदे।
9 जहोवा, नानागती होलो लोग काजे सरन आय,
आउर दुख-तकलीस ने पड़लो बेरा साहरा आय।
10 ए जहोवा, तुचो भगतमन, तुचो उपरे भोरसा करते रदे:
कसनबलले तुके डगरातो लोगमन के तुय केबई नी छांडसीस।
11 सियोन ने रतो जहोवा चो जय-जय गीत गाहा:
जात-जात चो लोगमन के हुनचो अचरित बुतामन के सांगा!
12 माने-मारामन के पलटा धरु महापरभु, हुनमन के नी भूलके:
आउर नानागती होलो लोगमन चो गुहार सुनेसे।
13 ए जहोवा, मोचो उपरे दया कर!
मोके मोरना ले बचाउ महापरभु,
मोचो बयरीमन मोके देतो तकलीस के दख।
14 तेबे मय जरूसलेम* चो देवड़ीमन लगे तुचो गुन गायंदे:
आउर तुचो करलो मुक्ति ले हरिक होयंदे।
15 तुचो बिरुद करतो जात-जात चो लोगमन आपलो खोड़लो खोदरा ने खुदे घसरला:
आपलो मंडालो फांदा ने आपनेचेमन फसला।
16 जहोवा नियाव करुन आपलो सत-गुन दखालोसे:
दुसट आपलेई करलो बुता ने फसलोसे। हिगायोन * निनास
17 दुसट लोगमन पतालपुरे* जादे,
महापरभु के नी मानतो सपाय जात-जात चो लोगमन हुताय जादे।
18 मानतर हुन, नानागती लोग के अमदेया काजे नी भुलकेदे:
आउर गरीब-दुखी चो आसा केबई नी टुटायदे।
19 ए जहोवा उठ, मनुकमन के सकत बीता होउक नी देस:
जात-जात चो लोगमन चो नियाव तुचो पुरे होओ।
20 ए जहोवा, हुनमन के डराव।
जात-जात चो लोगमन जानोत कि हुनमन सोजे मनुक चे आत। निनास