महापरभु चो मयमा
बजनेया मुखिया काजे: “गितीथ दीस” ने दाउद चो भजन-गीत
8
ए जहोवा, आमचो परभु,गुलाय मंजपुर ने तुचो नाव कितरो माहान आय!
तुय आपलो मयमा सरग उपरे दखालीस।
2 पिलामन बाटले आउर कोंहरो पिलामन बाटले आपलो जय-जय कराउन तुय आपलो सकत दखालीस,
असन करुन आपलो बयरीमन के आउर पलटा धरुमन के चिमनाय करलीस।
3 तुचो हाथ ले बनालो बादरी के,
बेर-जोन आउर तारामन के आपलाहान ठानमन ने संगालो के दखुन मय भक्यायंसे;
4 तेबे फेर माने काय आय कि तुय हुनके धियान देयसीस?
मोरतो मनुक काय आय कि तुय हुनचो फिकिर करसीस?
5 हुनके तुय आपलो ले खिंडिक चे नानी बनालीस,
मयमा आउर मान चो मुकुट हुनके पिंदालीस।
6 तुचो बनालो सपाय तीजमन हुनके सोपुन दिलीस;
तुय सपाय के हुनचो हक ने करुन दिलीस:
7 गाय-बयला, छेरी-मेंडी
आउर सपाय रान-जियाद;
8 आउर बादरी ने उड़तो चड़ई, आउर समदूर चो मछरीमन,
आउर समदूर ने पोंहरतो जीव-जनतुरमन के बले।
9 ए जहोवा, आमचो परभु,
गुलाय मंजपुर ने तुचो नाव कितरो माहान आय!