नियाव काजे पारथना
“सिगायोन दीस” ने दाउद चो भजन-गीत, जेके हुन जहोवा चो पुरे गावलो। ए गीत के बिनयामीन बंस चो कूस नाव बीता चो गोटमन किरता लिखलो।
7
ए मोचो महापरभु जहोवा, मय तुचो सरन ने एयंसे;मोके खेदतो लोगमन ले, मोके बचाव आउर छंडाव,
2 नोहले हुनमन बीजापुलिया-बाग धरलो असन मोके गोंदा-गोंदा करदे,
आउर मोके छंडातो लोग कोनी नी रदे।
3 ए मोचो महापरभु जहोवा, मय हुनमन बललो असन काई करलेसे;
नोहले कोकेई धोका दिलेसे,
4 आउर मोचो मीतमन ले मय भलई चो पलटा काई अडरा करलेसे,
नोहले हुनमन चो बयरीमन के साहरा करलेसे जाले,
5 मोचो बयरीमन मोके खेदुन धरोत,
मोके भुंये रमंदोत आउर मोचो इजित-मान के माटी ने मिसाओत। निनास
6 ए जहोवा महापरभु, उठ! आपलो रीस दखाव,
मोके जंजाल रीस ले अबायक डाटा-टेवा करतो लोग चो बिरुद उबा हो:
ए मोचो महापरभु, चेत कर! तुय ची सत नियाव करुआस।
7 जात-जात चो लोग चो मंडली, तुचो भोंवरक रूंडा होओ:
तुय आसनगादी ने बसुन हुनमन उपरे राज कर।
8 जहोवा जात-जात चो नियाव करु आय:
ए जहोवा, मोचो धरम बुता हिसाब ले मोचो नियाव कर।
कसनबलले मोचो ने काई दोख नीआय।
9 दुसटमन चो अडरा बुतामन नास होओ,
मानतर तुय धरमकारीमन के चमकट कर:
कसनबलले धरमी महापरभु,
बुद आउर मन-चेतन के परखुआय।
10 महापरभु मोचो ढाल आय,
हुन सोज लोगमन के बचाउआय।
11 महापरभु धरम आउर नियाव करु आय,
आउर रोजे आपलो रीस दखाउआय।
12 मनुकमन मन नी बोहड़ाला जाले, महापरभु आपलो खांडा के निसेदे;
हुन आपलो धनु-कांड झोकेयालोसे।
13 हुन आपलो हतियार के तियार करलोसे;
आउर आपलो कांडमन के आईग कांड बनालोसे।
14 दख, दुसट चो मन ने अडरा उआटमन उबजेसे,
आउर हुनचो पेटे उबढंगरी गोटमन भोरलीसे, हुनचो टोंड ले फंद गोटमन निकरेसे।
15 हुन दुसर काजे गड़िया खोदरा खोड़ेसे,
आउर आपलो खोड़लो खोदरा ने आपनेचे घसरेसे।
16 हुनचो उबागरी उलटुन हुनचेई उपरे पड़ेसे,
आउर हुनचो उबढंगरी हुनचेई मुंडे पड़ेसे।
17 जहोवा करलो सत नियाव हिसाब ले, मय हुनचो धन-धन करेंदे,
आउर सबुले बड़े महापरभु जहोवा चो भजन गायंदे।