दुख-तकलीस बेरा दया काजे पारथना
बजनेया मुखिया काजे: किंदरी बाजा बजाते, सेमिनित दीस ने दाउद चो भजन-गीत
6
ए जहोवा, तुय मोके रीस ले दागा नी देस,तुचो बाय-बिकाल रीस ले मोके डंड नी देस।
2 ए जहोवा, मय खुबे निमल होलेसे, मोचो उपरे दया कर;
ए जहोवा, मोचो हाड़ा-गोड़ा थरथरेसे, मोके चेकराव।
3 मोचो जीव बले खुबे डाहाल-बिकाल होयसे,
मानतर ए जहोवा, केबतले असन होते रयदे?
4 ए जहोवा, मोचो ले लापी नी रा, मोचो जीव के बचाव;
आपलो सत-मया ले मोके मुक्ति देस।
5 मोरलो पाछे कोनी तुके सूरता नी करदे:
पतालपुरे कोन तुचो धन-धन करदे?
6 मय कहरुन-कहरुन थाकले;
रोजे राती गागुन-गागुन मोचो आंसू ले मुंड-उसा भिजेसे;
मोचो आंसू ले ओचना बले भिजुन पोच-पोचा होयसे।
7 गागुन-गागुन मोचो आंईक-कान झीकी होलीसे;
डाटा-टेवा करतो लोग किरता मोचो आंईक झांवरी पड़लीसे।
8 ए ओधरमीमन, मोचो ले लापी गुचा;
जहोवा मोचो गागतो के सुनलोसे।
9 जहोवा मोचो गुहार के सुनलोसे;
जहोवा मोचो पारथना के सुनुन मानलोसे।
10 मोचो सपाय बयरीमन लाज पड़दे आउर खुबे डरदे;
आउर हुनमन लाज पड़ुन तूरते बोहड़ुन जादे।