दुसट लोग ले बचातो काजे पारथना
बजनेया मुखिया काजे: बांवसी फूकते दाउद चो भजन-गीत
5
ए जहोवा, मोचो पारथना सुन,मोचो कहरतो के धियान देस।
2 ए मोचो राजा, ए मोचो महापरभु, मोचो गुहार सुन:
कसनबलले तुके ची पारथना करेंसे।
3 ए जहोवा, बड़े बियाने तुय मोचो राग सुनसे;
मय बड़े बियाने पारथना करुन तुचो बाट दखेंदे।
4 सते, तुय दुसट बुता ले हरिक होतो महापरभु नोआस;
तुचोने काई कपट रउक नी सके।
5 तुचो पुरे गुमानीमन उबा होउक नी सकोत:
तुय सपाय अडरा बुता करुमन ले बईर करुआस।
6 फंद गोटेयातो लोग के तुय नास करुआस;
माने मारा आउर ठगा-फारसी करतो लोग के जहोवा घिनियाउआय।
7 मानतर मय तो, तुचो सत-मया किरता तुचो पवितर ठान ने एयंदे:
भक्ति संगे तुचो पवितर मंदिर बाटे डंडासरन करेंदे।
8 ए जहोवा, मोचो बयरीमन ले बाचतो काजे मोके तुचो धारनिक बाट ने चलाव;
तुचो बाट के मोके सरसरा दखाव।
9 कसनबलले हुनमन चो टोंडे काई सत नीआय;
हुनमन चो मने अबगो नास करतो बिचार आसे;
हुनमन चो सक उगाड़ी होलो मोठ असन आय;
आउर आपलो जीब ले फोबाउन-फोबाउन गोटेयायसोत।
10 ए महापरभु, हुनमन आपलो दोस के मानोत;
हुनमन आपलेई फांदा ने आपने फसोत;
हुनमन के आपलेई पाप किरता डंड दे;
कसनबलले हुनमन तुचो बिरुद उबढंगरी बुता करलासोत।
11 मानतर तुचो उपरे भोरसा करतो लोग हरिक होओत;
हुनमन अमदेया हरिक ले गावते रओत।
तुय हुनमन के रखेया करुआस,
एईकाजे तुचो नाव धरतो लोग बले तुचोने खुबे हरिक होओत।
12 ए जहोवा, तुय धरमकारी के बर देसे;
आउर आपलो मया ले हुनचो भोंवरक ढाल असन आड़ रसे।