साहरा काजे पारथना
बजनेया मुखिया काजे किंदरी बाजा बजाते दाउद चो भजन-गीत
4
ए मोचो धारनिक महापरभु, मोचो हागदिलो बेरा सुन!बिपती ने पड़लो बेरा, तुय मोके साका होलीस।
दया करुन मोचो पारथना सुन।
2 ए लोगमन, तुमी केबले मोचो मान करतो पलटा इजित धरासे?
केबले फोकाहा गोटमन के मन करुन फंद बदी देते राहासे? निनास
3 एके जानुन राहा जहोवा, भगतमन के आपलो काजे अलगालोसे:
जिदलदांय मय जहोवा के हागदेयंसे, हुन मोचो सुनेसे।
4 महापरभु के डरा, पाप नी करा:
आपलो ओचना ने मने-मने एके बिचारुन ओगाय राहा। निनास
5 धारनिक जतरा चेगाहा,
आउर जहोवा उपरे भोरसा करा।
6 खुबे लोग बलुआत, कोन आमचो भलई करेदे?
ए जहोवा, तुचो दया आमचो उपरे होओ।
7 अरन आउर अंगुर रस चो खुबे उबज ले बले आगर हरिक,
तुय मोचो मन ने भोरलीस।
8 मय अस्तिर ले लोंडुन सोयंदे;
कसनबलले ए जहोवा, तुय ची मोचो साहरा होयसीस।