जहूदीमन के आपलो रखेया करतो हक मिरतोर
8
हुनी दिने राजा छयरस, जहूदीमन चो बिरुद करु हामान चो हक ने रलो घर-दुआर के, एसतेर रानी के दिलो। एसतेर, मोरदकय आउर आपलो नाता-पंता चो बारे ने राजा के सांगु रये, एईकाजे मोरदकय के राजा पुरे एतो हक मिरली। 2 तेबे राजा, हामान ले धरलो आपलो मोहर-मूंदी के मोरदकय के दिलो। एईकाजे एसतेर, मोरदकय के हामान चो घर-दुआर चो हकदार बनाली।3 फेर एसतेर, राजा के पांय पड़ुन गागली आउर अगागी हामान चो अडरा बुता आउर जहूदीमन के सत्यानास करतो हुनचो उआट के पलटतो काजे घन-घन गुहारली। 4 तेबे राजा, सोन चो राजगुबा के एसतेर बाटे लमालो। 5 एसतेर उबली; आउर राजा के बलली, “राजा चो मन आसे आउर मोचोले हरिक आसे आउर ए गोट हुनके नंगत लागेसे आउर मोके बलतो हक आसे जाले जोन चिटीमन अगागी हमदाता चो बेटा हामान, राजा चो सपाय परघनमन ने जहूदीमन के नास करतो उआट ले लिखु रये, हुनके पलटतो काजे लिखोत। 6 मय आपलो कुटुम-लोग उपरे एतो बिपती के कसन दखुक सकेंदे? मय आपलो भाईमन चो सत्यानास होतोके कसन दखुक सकेंदे?” 7 तेबे राजा छयरस, रानी एसतेर आउर जहूदी मोरदकय के बललो, “मय हामान चो घर-दुआर के तो एसतेर के दिले, आउर हामान के उचकले, कसनबलले हुन, जहूदीमन के नास करतो उआट करलो। 8 एईकाजे तुय आपलो बुद हिसाब ले राजा चो नाव ने जहूदीमन के चिटी लिख आउर राजा चो मूंदी चो चीना बले लगाव; कसनबलले जोन चिटी राजा चो नाव ने लिखलोर आसे, आउर मूंदी चो चीना लगालोर आसे, हुनके कोनी पलटुक नी सकोत।”
9 एईकाजे तीसर मयना सीवान चो तेबीसवां दिने, राजा थानो लिखतो बीतामन के हागदिला, आउर जोन-जोन गोटमन चो हुकुम मोरदकय हुनमन के देउ रये, हुनके जहूदीमन आउर भारत ले धरुन कूस देस् अमरतले एक सव सतायीस परघनमन चो सपाय हक संगातो बीतामन, राजपालमन आउर परघनमन चो मुखियामन के आपलो-आपलो परघनमन चो अखरमन ने आउर सपाय लोगमन के आपलाहान भासामन ने, आउर जहूदीमन काजे हुनमन चो अखर आउर भासा ने लिखला। 10 मोरदकय, राजा छयरस चो नाव ने चिटी लिखालो आउर हुता राजा चो मूंदी चो चीना लगाउन जोर ले परातो घोड़ामन ने डाकवामन चो हाथे पठालो। 11 ए चिटीमन ने राजा, सपाय सहरमन चो जहूदीमन के रूंडा होउन आपलाहान जीव बचातो काजे तियार रतो छुट दिलो कि कोनी जात नोहले परघन चो लोगमन, हुनमन संगे ओनियाव करसोत आउर बायले-पिलामन के तकलीस करसोत जाले, हुनमन के मोरते मारुन सत्यानास करोत आउर हुनमन चो धन-माल के झीका-उड़मा करोत। 12 राजा छयरस चो सपाय परघनमन ने बारवां मयना अदार चो तेरवां दिने असन करोत। 13 राजा चो हुकुम चो ए चिटीमन के गुलाय राज चो सपाय परघन ने रतो सपाय लोगमन के पठाला कि जहूदीमन हुन दिने आपलो बयरीमन ले पलटा धरतो काजे तियार रओत। 14 राजा चो हुकुम ले डाकवामन जोर ले परातो घोड़ामन ने झटके गेला। ए हुकुम, सूसन राजभाड़ा ने देउ रये।
15 तेबे मोरदकय, नीलिया आउर पंडरी रंग चो पाट आउर मुंडे सोन चो बड़े मुकुट पींदलो आउर बांगा रंग चो सूत ले बनालो खांद ओड़ना ओड़ुन राजा चो पुरे ले बाहरे निकरलो, तेबे सूसन सहर चो लोग जय-जय करला आउर हरिक-उदीम होला। 16 जहूदीमन खुबे हरिक-उदीम होला आउर हुनमन चो खुबे इजित-मान होली। 17 जोन परघनमन आउर सहरमन ने राजा चो हुकुम आउर नियम अमरली, हुता जहूदीमन हरिक-उदीम होला आउर हुन दिने तिहार मनाला। हुनचो पाछे हुन देस् चो खुबे लोगमन जहूदीमन चो डर काजे जहूदी होला।