नेहेमियाह
आगे एके पढ़ा
नेहेमियाह चो किताप के 445-420 ई.पू ने एजरा लिखलो। एजरा आउर नेहेमियाह गोटकी समया ने रला। नेहेमियाह, फारस चो अरतछतर राजा के अंगुर-रस खुआउ बीता रये। हुन राजा, नेहेमियाह के जहूदा चो राजपाल बनालो।
नेहेमियाह चो किताप के तीन भाग करुन समजुक सकुं। पईल भाग ने, जरूसलेम मंदिर चो भाड़ा के जतनातो बेरा जहूदा चो राजपाल नेहेमियाह, मुखिया होउन करालो बुतामन आसे। दुसर भाग ने, महापरभु चो नियम-कानुन के एजरा धियान ले पढ़ुन सुनातोर आउर लोगमन आपलो करलो पाप के मानतो चो बारे ने आसे। तीसर भाग ने, जहूदा चो राजपाल होउन नेहेमियाह करलो दुसर-दुसर बुतामन चो बारे ने सांगेसे।
जहूदी कयदीमन के बेबीलोन ले छंडाउन आनतो तीसर आउर सरासरी हार नेहेमियाह मुखिया रलो। कयद ले ईलो लोगमन के, फेर ले बसापत करातो काजे जहोवा नेहेमियाह के बाछलो। फारस चो अरतछतर राजा, राज करतो चो बीसवां बरक ने, नेहेमियाह जरूसलेम ने ईलो आउर बेबिलोन चो राजा सव बरक आगे उजड़ालो जरूसलेम मंदिर चो भाड़ा के हुन, जहूदीमन संगे मिसुन जतनालो।
जरूसलेम मंदिर चो भाड़ा के जतनातो बेरा खुबे बयरीमन आउर खुद-खाउमन हुनमन के खुबे बिरुद करला। तेबले बले ए बुता के, दुय-कोड़ी बारा दिन ने जतनाउन सारला। एचोले सपाय लोग जानला, महापरभु चो सकत ले ची ए बुता पुरा होली।
नेहेमियाह, महापरभु उपरे पुरा भोरसा संगातोर आउर हुनचोले अमदेया पारथना करतोर, ए किताप चो खास सिखिया आय।