इसराएलिमन आपलो पाप काजे खिसियातोर
10
जिदलदांय एजरा, महापरभु चो मंदिर पुरे गागुन-गागुन पारथना ने आपलो पापमन के मानुन डंडासरन करते रये, हुदलदांय इसराएल चो बायले-मनुकमन आउर पिलामन चो खुबे बड़े भीड़, हुनचो लगे रूंडा होला। हुनमन बले छाती-पेटी होउन-होउन गागुक मुरियाला। 2 तेबे एलाम चो थरलर ले जहीएल चो बेटा सकन्याह, एजरा के बललो, “आमी ए देस् चो बिजाती बायलेमन के बिया होउन महापरभु चो बिरुद ने निमकधुसा करलुसे। मानतर एई गती ने बले इसराएलिमन काजे आसा आसे। 3 एईकाजे एदांय आमी आपलो महापरभु संगे बायदा करुं, आमचो मालिक एजरा आउर महापरभु चो हुकुम के डरतो लोग चो सला हिसाब ले, सपाय बिजाती बायले-पिलामन के आपलो ले लापी करुं। एके आमी नियम-कानुन हिसाब ले ची करुं। 4 तुय उठ, ए बुता तुकेई करतोर आय। आमी तुचो संगे आंसु, ढाढ़ुस करुन ए बुता के कर।” 5 तेबे एजरा उठलो आउर पुजारीमन चो मुखियामन, लेवीमन, आउर सपाय इसराएलिमन के बायदा करालो कि महापरभु चो हुकुम हिसाब ले हुनमन सपाय बिजाती बायले-पिलामन के आपलो ले लापी करदे। हुनमन उसनेची बायदा करला।बिजाती बायले-पिलामन के लापी करतोर
6 पाछे एजरा, महापरभु चो मंदिर पुरे ले उठलो आउर एल्यासीब चो बेटा जहोहानान चो बाकरा ने गेलो आउर गोटोक राती हुताय ठेबलो। हुता जाउन हुन काई ची नी खादलो, कसनबलले हुन, कयद ले ईलो लोगमन चो घिन-घिना बुता किरता करलाते रलो। 7 तेबे मुखियामन आउर धरम-सियानमन, जहूदा आउर जरूसलेम ने ईलो जमाय कयदीमन के जरूसलेम ने रूंडा होतो काजे सांगला। 8 जोन बले तीन दिन ने जरूसलेम ने नी एदे, हुनमन चो सपाय धन-माल के, मुखियामन आउर धरम-सियानमन चो हुकुम हिसाब ले कुड़की करुन नेदे आउर कयद ले ईलो लोगमन चो मंडली ले अलग होदे।
9 तेबे जहूदा आउर बिन्यामीन चो सपाय मनुकमन तीन दिन भीतरे जरूसलेम ने रूंडा होला। असन नवां मयना चो बीसवां दिने होली। सपाय लोग महापरभु चो मंदिर चो दुआरे बसुन रला। ए हुकुम चो डर आउर झड़ धरलो बरसा किरता सपाय थरथरुन-थरथरुन रला। 10 तेबे एजरा पुजारी उबा होउन हुनमन के बललो, “तुमी बिजाती बायलेमन के बिया होउन महापरभु चो बिरुद निमकधुसा करलास आउर एचोले इसराएल चो पाप बाड़ली। 11 एईकाजे, एदांय आपलो पुरखामन चो महापरभु पुरे आपलो पापमन के माना आउर हुनचो मन-इछा असन धन-धन करा। ए देस् चो लोगमन ले आउर बिजाती बायलेमन ले आपने अलग होआ।” 12 तेबे मंडली चो सपाय लोग जोर ले बलला, “जसन तुय बलसीस, उसने करतोर आमचो काजे नंगत होयदे। 13 मानतर आमी खुबे लोग आसुं आउर एबे चमास चो समया आय, एईकाजे आमी बाहरे उबा रउक नी सकुं। ए दुय दिन चो बुता नोआय। कसनबलले आमीमन ले खुबे लोग महापरभु चो बिरुद ओधरम करलुसे। 14 एईकाजे सपाय मंडली चो मुखियामन पुरे एओत, आउर कबूल धरालो समया ने, जोन-जोन बिजाती बायलेमन के बिया होलासोत, हुनमन जरूसलेम ने एओत आउर हुनमन संगे हुनमन चो सहर चो धरम-सियानमन आउर नियावकरुमन बले एओत। आमचो ओधरम किरता महापरभु चो रीस आमचो उपर ले उतरतले उसने होते रओ।” 15 मानतर असाहेल चो बेटा जोनातान आउर तिकवा चो बेटा जहजयाह हुनमन चो बिरुद होला आउर लेवीमन ले मसुल्लाम आउर सब्बतई बले जोनातान आउर जहजयाह बाटे होला।
16 कयद ले बोहड़ुन ईलो लोगमन ए गोट के मानला। तेबे एजरा पुजारी सपाय कुटुम ले गोटोक-गोटोक कुटुम-मुखिया के नाव धरुन बाछलो आउर दसवां मयना चो पईल दिने, मुखियामन चो मंडली बसाला कि बिजाती बायलेमन के बिया होलो मनुकमन चो बारे ने परखुन जानोत। 17 पईल मयना चो पईल दिने, हुनमन बिजाती बायलेमन के बिया होलो सपाय मनुकमन चो बारे ने डगराउन सारला।
18 पुजारीमन चो थरलर ले, बिजाती बायलेमन के बिया होलो मनुकमन एमन आत। जोसादाक चो बेटा जेसुअ आउर हुनचो भाईमन: मासेयाह, एलीएजर, जारीब आउर गदल्याह। 19 हुनमन बायदा करुन बलला, आमी आमचो बायलेमन के निकराउन देउंदे आउर हुनमन आपलो पाप के मानुन आपलाहान काजे गोटोक-गोटोक मेंडा के दोख-जतरा चेगाला। 20 इम्मेर पुजारी चो बेटामन ले हनानी आउर जबद्याह। 21 हारीम पुजारी चो बेटामन ले मासेयाह, एलीयाह, समायाह, जहीएल आउर उज्जियाह। 22 पसहूर पुजारी चो बेटामन ले एल्योनई, मासेयाह, इसमाएल, नतनेल, जोजाबाद, आउर एलासा।
23 जोन लेवीमन, बिजाती बायलेमन के बिया होउन रला, हुनमन एमन आत: जोजाबाद, सिमई, केलायाह, (जेके कलीता बलते रला), पतहयाह, जहूदा आउर एलीएजर। 24 मंदिर चो गीत-कुरियामन ले एल्यासीब आउर रखेया करुमन ले सल्लूम, तेलेम आउर ऊरी।
25 बाचलो इसराएलिमन ले बिजाती बायलेमन के बिया होलो मनुकमन एमन आत: परोस चो थरलर ले रम्याह, जज्जियाह, मल्कियाह, मियामीन, एलीआजर, हसब्याह आउर बनायाह। 26 एलाम चो बेटामन ले मतन्याह, जकरियाह, जहीएल, अबदी, जरेमोत आउर एलीयाह। 27 जत्तू चो बेटामन ले एल्योनई, एल्यासीब, मतन्याह, जरेमोत, जाबाद, आउर अजीजा। 28 बेबई चो बेटामन ले जहोहानान, हनन्याह, जब्बई आउर अतलई। 29 बानी चो बेटामन ले मसुल्लाम, मल्लूक, अदायाह, जासूब, सेआल आउर जरामोत। 30 पहत-मोआब चो बेटामन ले अदना, कलाल, बनायाह, मासेयाह, मतन्याह, बसलेल, बिन्नूई आउर मनस्से। 31 हारीम चो बेटामन ले एलीएजर, जिसियाह, मल्कियाह, समायाह, सिमोन; 32 बिन्यामीन, मल्लूक आउर सेमरयाह। 33 हासूम चो बेटामन ले मतनई, मतता, जाबाद, एलीपेलेत, जरेमई, मनस्से, आउर सिमई। 34 बानी चो बेटामन ले, मादई, अमराम, ऊएल; 35 बनायाह, बेदयाह, कलूही; 36 बन्याह, मरेमोत, एल्यासीब; 37 मतन्याह, मतनई, जासू; 38 बानी, बिन्नूई चो थरलर ले, सिमई; 39 सेलेम्याह, नातान, अदायाह; 40 मक्नदबई, सासई, सारई; 41 अजरेल, सेलेम्याह, सेमरयाह; 42 सल्लूम, अमरियाह आउर जोसेप। 43 नबो चो बेटामन ले जीएल, मतित्याह, जाबाद, जबीना, जद्दई, जोएल, आउर बनायाह। 44 एमन सपाय बिजाती बायलेमन के बिया होउन रला। हुनमन के आपलो बायलेमन आउर बेटामन के बले छांडुक पड़ली।