2 सामुएल
आगे एके पढ़ा
सामुएल किताप चो दुसर भाग ने, दाउद चो जीवना चो बारे ने लिखलोर आसे। सामुएल बाटले अबिसेक होलो दाउद राजा मूर ने, इसराएल चो बेर-उदिया उजा बाट चो जहूदा परघन ने राज करते रये (अध्या 1-4), फेर हुनचो राज, इसराएल चो बेर-उदिया डेबरी बाट चो परघनमन ने बाड़ली (अध्या 5-24) मानतर पाछे, बि.सी 1000 ने जरूसलेम के राज-सहर करुन सपाय इसराएल देस् उपरे राज करलो। ए किताप ने दाउद राजा आपलो राज के चमकट आउर बाड़ती करालो बारे ने लिखलोर आसे। आपलो घर-कुटुम बयरीमन आउर दुसर देसमन हुनचो बिरुद होलो किरता हुनके अमदेया जुद करुक पड़ली। आपलो इछा नी रले बले, हुनके आपलो जीवना भर जुद करुन लोउ बहाउक पड़ली।
हुनचो बारे ने सबुले नंगत गोट ए आय, हुन महापरभु उपरे पुरा भोरसा करते रये। हुन आपलेई मन-इछा पुरा करतो काजे कटुर पाप करलो। मानतर जेबे महापरभु, नातान अगमजानी बाटले दाउद के खीजलो, तेबे दाउद आपलो पाप के मानुन महापरभु दिलो डंड के आपने पावलो। सुलेमान चो राजपाट एओतले, हुनचो राज ने, राजपाट काजे खुबे झीका-टाना होते रये।
दाउद चो जीवना ले इसराएलिमन उपरे इतरो असर होली, दाउद चो राजपाट सरलो पाछे, जेबे हुनमन चो देस् खुबे चिपा ने पड़ली, तेबे हुनमन महापरभु के असन बलुन गुहारला, आमचो काजे दाउद असन गोटोक मुक्तीदेउ के पठाव।