1 समुएल
आगे एके पढ़ा
समुएल लिखलो पईल किताप ने इसराएलिमन चो सरासरी नियावकरुमन चो समया ले धरुन राज-नीति चो मूर आउर राज-नीति बदलतो चो बारे ने बावरलोर आसे। इसराएल देस् ने राज-नीति बदलतोर तीनझन मनुकमन संगे जुड़लोर आसे। एमन, इसराएल चो सरासरी नियाव करु समुएल, इसराएल चो पईल राजा साउल, आउर दाउद आत। दाउद, राजपाट ने एतोले आगे करलो बड़े-बड़े बुतामन, समुएल आउर साउल चो गोटमन संगे गुतलोर आसे। जुना नियम बेरा घटलो गोटमन चो बारे ने दुसर कितापमन ने लिखलोर आसे, उसने ए किताप ने बले लिखलोर आसे। महापरभु चो भक्ति करलोने जीतुआय, मानतर महापरभु चो गोट नी मानले खुबे बिपती एउआय। ए गोट, महापरभु बाटले एली पुजारी के खुबे नंगत ले सांगलोर आसे। महापरभु बललोसे, “जोन मोके मान करेदे, मय हुनचो मान करेंदे आउर जोन मोके घिनियायदे, हुन नानी होयदे।” ए किताप ने, राजपाट चो मूर चो बारे ने, लोगमन चो आउर-आउर बिचारमन आसे। महापरभु के ची इसराएल चो सत राजा मानते रओत। मानतर लोगमन चो गुहार के सुनुन महापरभु हुनमन काजे गोटोक राजा बाछुन दिलो।
खास गोट ए आय कि इसराएल चो राजा आउर लोगमन दुनो महापरभु चो सासन आउर नियाव चो हक ने रओत। महापरभु चो नियम-कानुन हिसाब ले सवकार नोहले गरीब, सपाय लोगमन के गोटकी हक आसे।