बोअज आउर रूत चो बिया
4
तेबे बोअज सहर-देवड़ी लगे जाउन बसलो आउर जोन छंडातो बीता चो गोट बोअज सांगुन रये हुन बले ईलो। तेबे बोअज बललो, “ए मीत, ए बाटे एउन एताय बस।” तेबे हुन, हुन बाटे जाउन बसलो। 2 बोअज, सहर चो दस झन सियानमन के हागदेउन बललो, “एताय बसा,” हुनमन बले बसला। 3 तेबे बोअज, छंडातो हक बीता के बललो, “नाओमी जोन मोआब देस् ले बोहड़ुन ईलीसे हुन आमचो भाई एलीमेलेक चो गोंदाएक भुंय बिकूक मन करेसे। 4 एईकाजे मय बिचारले, ए गोट मय तुके सांगेंदे कि एता बसलो लोगमन चो पुरे आउर मोचो कुटुम-सियानमन चो पुरे एदांय तुय हुनके मोल देउन घेन। आउर छंडाउक मन करसीस जाले, छंडाव आउर तुय नी छंडायीस जाले मोके सांग। कसनबलले तुके छांडुन आउर कोकई हुन भुंय के छंडातो हक नीआय आउर तुचो पाछे मोचो हक आसे।” हुन बललो, “मय हुन भुंय के छंडायंदे।” 5 तेबे बोअज बललो, “जोन दिने तुय हुन भुंय के नाओमी चो हाथ ले छंडासे, हुन दिने, तुके मोआबिन रांडी बायले रूत के बले छंडाउक पड़ेदे। एईकाजे कि हुन मोरलो बीता चो नाव हुनचो बाटा उपरे अमदेया रओ।” 6 एदांय हुनचो छंडातो हक बीता बललो, “मय हुनके छंडाउक नी सकें। असन नी होओ कि मोचो निज बाटा नसुन जाओ। एईकाजे मोचो छंडातो हक के तुय धर। कसनबलले मय हुनके छंडाउक नी सकें।”7 आगे जुगे, इसराएल ने छंडातो आउर बदलतो चो बारे ने पक्का करतो काजे आपलो पनई हिटाउन दुसर के देतो नीती रये। इसराएल ने एई नीती ले गवई होते रली। 8 एईकाजे हुनचो कुटुम चो छंडाउ बीता बोअज के असन बललो, “तुय हुनके मोल देउन घेन,” आउर आपलो पनई के हिटालो। 9 तेबे बोअज, सियान लोगमन आउर सपाय लोगमन के बललो, “तुमी आजी ए गोट चो गवई आसास कि जोन बले आगे एलीमेलेक, किलयोन आउर महलोन चो रये हुन सपाय के मय नाओमी चो हाथ ले मोल देउन छंडायंसे। 10 फेर महलोन चो मोआबिन बायले रूत के बले मय आपलो बायले बनातो काजे बिचारलेसे कि मोरलो बीता चो नाव हुनचो निज बाटा ने अमदेया रओ। नोहले हुन मोरलो बीता चो नाव आपलो भाईमन ले आउर हुनचो पटा-परची ले मेटुन जायदे। आजी एचो गवई तुमी सपाय आहास।” 11 तेबे देवड़ी लगे रलो सपाय लोग आउर सियानमन बलला, “आमी गवई आसुं, ए बायले जोन तुचो घरे एयसे, जहोवा हुनके राहेल आउर लिआ असन करो जोनमन इसराएल चो कुटुम चो मूर आयामन होला, आउर एफराता ने तुचो लेउर बाड़ो आउर बेतलहम ने तुय नाव कमाव। 12 जहोवा ए जुवान बायले ले तुके जोन पिला देयदे, हुनचो ले तुचो घर पेरेस चो घर असन होओ, जोन तामार ले जहूदा बाटले जनमलो।”
बोअज चो थर-लर
13 असन बरन ले बोअज, रूत के बिया होलो आउर हुन हुनचो बायले होली। जेबे बोअज हुनचो संगे सोवलो तेबे महापरभु चो दया ले रूत पेटे ठेबली आउर गोटोक बेटा पावली। 14 तेबे बायलेमन नाओमी के बलला, “धन-धन आय महापरभु, जोन तुचो थर बड़ातो काजे तुके आजी गोटोक नाती दिलोसे, इसराएल ने एचो नाव बड़े होओ! 15 आउर ए पिला, तुचो जीव के अस्तिर करतो बीता आउर तुके सियान बेरा पोसतो बीता होओ; कसनबलले तुचो बुआरी तुके मया करुआय आउर सात झन बेटामन ले बले आगर नंगत आय।” 16 तेबे नाओमी हुन पिला के आपलो कोरा ने धरुन हुनचो काजे सूईन चो बुता करुक मुरियाली। 17 हुनचो घर-लग चो बायलेमन बलला, “नाओमी घरे गोटोक बेटा होलोसे।” हुन लेका-पिला चो नाव ओबेद संगाला। हुनी ओबेद, जिसय चो बुआ आउर दाउद चो दादी होलो। 18 पेरेस चो थर-लर एमन आत बललोने, पेरेस, हिसरोन चो बुआ रये। 19 हिसरोन, राम चो बुआ रये; आउर राम, अमीनादाब चो बुआ रये। 20 अमीनादाब, नहसोन चो बुआ रये; नहसोन, सलमोन चो बुआ रये। 21 सलमोन, बोअज चो बुआ रये; बोअज, ओबेद चो बुआ रये। 22 ओबेद, जिसय चो बुआ रये; आउर जिसय, दाउद चो बुआ रये।