1 समुएल
एलकाना आउर हुनचो घर-लोग
1
एपरेम चो डोंगरी परघन चो रामातेम-सोपीम सहर ने एलकाना नाव चो गोटोक मनुक रलो। हुन, जरोहाम चो बेटा, एलीहू चो नाती आउर एपरेमेया सूफ चो बेटा तोहु चो पुती रये। 2 हुनचो दुय झन बायलेमन रला। एकलो चो नाव हन्ना आउर दुसर चो नाव पनिन्ना रये। पनिन्ना के पिलामन रला, मानतर हन्ना के पिला-झीला नी रला। 3 एलकाना रोजे बरक, सेनामन चो जहोवा* के डंडासरन करतो काजे आउर जतरा चेगातो काजे आपलो सहर ले सीलोह ने जाते रये, हुता एली पुजारी चो दुय झन बेटामन होफनी आउर पीनेहास जहोवा चो पुजारीमन रला। 4 जेबे-जेबे एलकाना जतरा चेगाते रये, तेबे-तेबे हुन आपलो बायले पनिन्ना के आउर हुनचो बेटा-बेटीमन के बाटा देते रये। 5 मानतर हन्ना के हुन, दुय-दुना बाटा देते रये। जहोवा हन्ना के बांझीन बनाउ रये फेर बले एलकाना हुनके खुबे मया करते रये। 6 जहोवा हुनके कोनी पिला-झीला नी दिलो एईकाजे हुनचो सोउत पनिन्ना हुनके खुबे टेचराते रये। 7 हुन रोजे बरक असनेचे करते रये आउर जेबे-जेबे हन्ना, जहोवा चो मंदिर ने जाते रये पनिन्ना हुनके खुबे टेचराते-कुरलाते रये। एईकाजे हन्ना गागुन-गागुन रते रये आउर काई बले नी खाते रये। 8 तेबे हुनचो मनुक एलकाना हुनके बललो, “ए हन्ना, तुय काय काजे गागुन-गागुन आसीस आउर काय काजे काई नी खायीस? तुय काय-काजे मुरुसनाय होलीसीस? काय, मय तुचो काजे दस झन बेटामन ले बले नंगत नुआय?”हन्ना आउर एली पुजारी
9 गोटोक दिने सीलोह ने, हुनमन खादलो पाछे हन्ना उठली आउर जहोवा चो मंदिर ने गेली। जहोवा चो मंदिर चो चवकट लगे एली पुजारी गादी ने बसुन रये। 10 हन्ना खुबे डाहाल-बिकाल होउन सुयकुन-सुयकुन गागते जहोवा ले गुहारते रली। 11 आउर हुन गोटोक बोदना बोअली, “ए सेनामन चो जहोवा, सते तुय आपलो कमेयीन चो दुख-डंड के दखसीस आउर आपलो कमेयीन के धियान देउन सूरता करसीस जाले, आपलो कमेयीन के गोटोक बेटा देस, मय हुनके जीवता-जीव भर काजे तुके सोपुन देयंदे आउर हुनचो मुंड के केबई खुराउक नी देयंदे।” 12 हुन, जहोवा चो पुरे असन पारथना करतोदांय एली पुजारी हुनचो टोंड के दखते रये। 13 हन्ना, मने-मने पारथना करते रये गुने हुनचो टोंड तो चुलबुलते रये, मानतर हुनचो गोट सुनुक नी होते रये। एईकाजे एली के लागली कि हुन मातलीसे। 14 तेबे एली हुनके बललो, “तुय केबतले मातुन रउआस बे। तुय एदांय उमंज।” 15 हन्ना बलली, “नाई, ए मोचो परभु, मय खुबे दुखीयारीन आंय, मय अंगुर-मंद नोहले काई बरन चो मंद-सूर नी खादलेसे। मय आपलो मन चो सपाय गोट जहोवा के सांगलेसे। 16 आपलो कमेयीन के अडरा बायले नी समज। जोन बले मय एबतले बललेसे, मोके खुबे टेचरालो किरता मुरुसनाय होउन बललेसे।” 17 एली बललो, “अस्तिर ने जा, इसराएल चो महापरभु तुके, तुचो मन भावतो बर देओ।” 18 हन्ना बलली, “तुचो कमेयीन तुचो नंजर ने दया पाओ।” आउर हुन हुताले गेली, भात-पेज खादली आउर केबई मुरमुरा नी होली।
समुएल चो जनम आउर हुनके महापरभु के सोपतोर
19 एलकाना आउर हुनचो घर-लोग बड़े बियाने उठुन जहोवा के डंडासरन करला आउर रामा ने आपलो घरे गेला। एलकाना आपलो बायले हन्ना लगे गेलो आउर जहोवा हुनचो गुहार के सूरता करलो। 20 तेबे हन्ना पेटे ठेबली आउर हुन गोटोक बेटा पावली। “मय एके जहोवा ले मांगुन पावलेसे” बलुन हुनचो नाव समुएल संगाली। 21 फेर एलकाना रोजे बरक असन, आपलो सपाय घर-लोग संगे जहोवा चो पुरे मिला-मिसा जतरा चेगातो काजे आउर आपलो बोअलो बोदना पुरा करतो काजे गेलो। 22 मानतर हन्ना आपलो मनुक के असन बलुन घरे ठेबली, “जिदलदांय मोचो बेटा गोरस छांडेदे हुदलदांय मय हुनके मंदिर ने नेयंदे कि हुन, जहोवा पुरे अमदेया काजे रओ।” 23 हुनचो मनुक एलकाना हुनके बललो, “जसन तुके नंगत लागेसे उसने कर, जिदलदांय ले तुय हुनके गोरस नी छंडायीस, हुदलदांय ले तुय एताय रा। मानतर जहोवा चो मन-इछा पुरा होओ।” एईकाजे हन्ना घरे रली आउर आपलो बेटा गोरस छांडोतले हुनके गोरस खुआते रली। 24 जिदलदांय हन्ना हुनके गोरस छंडाली, तेबे आपलो बेटा के सीलोह ने जहोवा चो मंदिर ने नीली। हुन आपलो संगे तीन बरक चो गोटोक बाछा आउर गोटोक बोरी* आटा आउर कोंडी* भरते अंगुर-रस बले नीली। हुदलदांय समुएल, पिला रये। 25 हुनमन बाछा पिला के जतरा चेगाउन भाति समुएल के एली पुजारी लगे अमराउन दिला 26 तेबे हन्ना बलली, “ए मोचो परभु, तुचो जीवना चो किरिया, मय हुनी बायले आंय जोन एताय तुचो पुरे उबा होउन जहोवा ले गुहारते रले। 27 ए हुनी लेका आय जेचो काजे मय गुहारते रयें आउर जहोवा मोके मन भावतो बर दिलोसे। 28 एईकाजे मय बले हुनके जहोवा के सोपेंसे कि ए आपलो जीवता-जीव भर जहोवाचेई सेवा करो।”
तेबे हुनमन जहोवा के डंडासरन करला आउर समुएल के हुताय छांडला।