हन्ना गुहारतोर
2
तेबे हन्ना गुहारुन बलली,“मोचो मन जहोवा किरता हरिक आसे, महापरभु किरता मोचो मान बाड़लीसे*, मोचो टोंड चो गोटमन ले बयरीमन के चिमनाय करेंदे, कसनबलले तुचो करलो मुक्ति ले मय हरिक आंसे। 2 जहोवा कटार पवितर कोनी नीआत, तुके छांडुन आउर कोनी ची नीआत, आमचो महापरभु असन सकत-सिलपट आउर कोनी नीआत। 3 गुमान करुन नी गोटेयाहा, तुमचो टोंड ले कुचर गोट नी निकरो; कसनबलले जहोवा गियानी महापरभु आय आउर सपाय बुतामन के परखु आय। 4 बड़े बीरमन चो धनु-कांडमन टुटली, मानतर निमल लोग चो करांडे सकत चो पट्टा बांदला। 5 जोनमन पेट भर खाते रओत, हुनमन के पेट काजे भूती जाउक पड़ली, मानतर जोनमन भूके रला हुनमन फेर भूके नी रला, जोन आगे बांझीन रये, हुनके सात झन पिलामन होला, मानतर पिला-झीलामन रलो बिती के कोनी साहरा नी होला। 6 जहोवा मोराउआय आउर हुनी जियाउआय; हुन पतालपुरे उतराउआय आउर हुताले निकराउ बले आय। 7 जहोवा गरीब बनाउआय आउर सवकार बले बनाउआय। हुनी घसराउ आय आउर उपरे उठाउ बले आय। 8 जहोवा नानागती लोग के धुरला ले उठाउआय आउर गरीब-धुरीबमन के लाकड़ी-कुड़ा ले निकराउआय आउर हुनमन के राजपालमन संगे बसाउआय आउर मयमा-मान राजगादी चो हकदार बनाउआय। कसनबलले मंजपुर चो पाया जहोवाचेई आय आउर हुता हुन मंजपुर के चमकट करलोसे। 9 जहोवा आपलो भगतमन चो पांयमन के समालुन रयदे, मानतर दुसटमन अंधार ने चिमनाय पड़ुन रदे। कसनबलले कोनी मनुक आपलो सकत ले जीतुक नी सकदे। 10 जोनमन जहोवा चो बिरुद करुआत हुनमन सत्यानास होदे। जहोवा हुनमन चो बिरुद बादरी ले गरजेदे आउर गुलाय मंजपुर चो नियाव करेदे। हुन आपलो बाछलो राजा के अबिसेक करुन हुनचो सकत आउर मान बड़ायदे।”
11 तेबे एलकाना, रामा ने आपलो घरे गेलो आउर समुएल, एली पुजारी संगे रउन जहोवा चो सेवा-सुस्तारा करुक मुरियालो।
एली पुजारी चो उबढंगरी बेटामन
12 एली पुजारी चो बेटामन होफनी आउर पीनेहास उबढंगरी रओत। हुनमन जहोवा के नी मानला। 13 होफनी आउर पीनेहास पुजारीमन आपलो काजे असन नीती बनाउन रला कि जेबे बले कोनी मनुक जतरा चेगाउन मास रांदते रओत, तेबे पुजारी चो सेवक* तीन कोनेया काटा के हाथे धरुन 14 चड़वा, गंजी, कुंडरी नोहले नकी-भंडवा भीतरे कोचकुन जितरो मास काटा ने लटकते रये, हुनके पुजारी काजे धरते रये। हुनमन सीलोह ने एतो जमाय इसराएलिमन संगे असनेचे करते रओत। 15 आउर बेदी ने बसील के डसातोले आगे पुजारी चो सेवक एउन मिला-मिसा जतरा चेगातो लोग के असन बलते रये, “भूंजतो काजे पुजारी के मास देस, हुन तुचो रांदलो मास के नाई, काचा मास ची धरेदे।” 16 कोनी मनुक हुनके असन बललोने, “एबे बसील के डसादे बे, पाछे जितरो तुचो मन करेदे उतलो धर।” तेबे हुन सेवक बलते रये, “नाई, एबे ची देस नोहले मय झीकुन नेयंदे।” 17 एईकाजे हुन जुवान पुजारीमन चो पाप-बुता जहोवा चो नंजर ने खुबे बड़े होली। कसनबलले हुनमन जहोवा चो भेंट के हिनस्ता मानते रला।
लेका समुएल सीलोह ने
18 मानतर लेका समुएल, पुजारीमन पींदतो मकमल फटई चो एपोद पींदुन जहोवा पुरे सेवा-सासन करते रये। 19 जेबे-जेबे हन्ना आपलो मनुक संगे रोेजे बरक जतरा चेगाउक सीलोह ने जाते रये, तेबे-तेबे हुन, समुएल काजे गोटोक नानी कुड़ता बनाउन हुनके देते रये। 20 तेबे एली पुजारी, एलकाना आउर हुनचो बायले हन्ना के बर देउन बललो, “एई बायले जहोवा ले मांगुन पावलो ए लेका के जहोवा के ची सोपली। ए लेका चो पलटा जहोवा, एई बायले ले तुचो थर-लर बड़ाओ।” तेबे हुनमन आपलो घरे गेला। 21 जहोवा, हन्ना के बर दिलो आउर हुन पेटे ठेबली आउर हुनके तीन झन बेटामन आउर दुय झन बेटीमन होला। समुएल जहोवा चो पुरे बाड़ते गेलो।
एली हुनचो बेटामन के समजायसे
22 एली खुबे डोकरा होउ रये आउर हुन सुनलो, हुनचो बेटामन इसराएलिमन ले खुबे अडरा बेबार करसोत बललोने, मिला-मिसा तम्बु चो दुआरे सेवा करतो बायलेमन संगे बेबिचार करसोत। 23 तेबे एली हुनमन के बललो, “तुमी काय काजे असन घिन-घिना बेबार करसाहास? मय सपाय लोगमन ले तुमचो घिन-घिना बेबार चो बारे ने सुनेंसे। 24 ए मोचो बेटामन, असन नी करा, कसनबलले जहोवा चो रयत ले जोन खबर मय सुनलेंसे हुन नंगत नोआय। 25 गोटोक मनुक, दुसर मनुक चो बिरुद पाप करलो जाले जहोवा हुनमन चो मंजी होयदे। मानतर कोनी मनुक जहोवा चो बिरुद पाप करलो जाले हुनचो मंजी कोन होदे?” तेबले बले हुनमन आपलो बुआ चो गोट नी धरला। कसनबलले जहोवा हुनमन के मारुक मन करते रये। 26 मानतर समुएल बाड़ते गेलो आउर जहोवा आउर लोगमन दुनो हुनचोले हरिक रओत।
एली पुजारी कुटुम चो बिरुद ने महापरभु चो अगमगोट
27 महापरभु चो गोटोक भगत, एली लगे जाउन हुनके बललो, “जहोवा बलेसे, ‘जेबे तुचो पुरखामन चो कुटुम मिसर देस् ने फिरोन* चो हक ने रली तेबे काय, मय हुनमन के दखा देउन साका नी होले? 28 आउर मय हुनके इसराएल चो सपाय बंसमन ले बाछुन रले कि हुन मोचो पुजारी रउन मोचो बेदी ने होम-जतरा चेगाओ आउर धूप गंधाओ आउर मोचो पुरे एपोद पींदुन रओ। मय तुचो पुरखा चो कुटुम के इसराएलिमन चो सपाय आईग जतरा चो बाटा चो हक बले देउन रयें। 29 तेबे फेर काय काजे तुमी मोचो काजे चेगालो जतरामन आउर चेगावामन के हिनस्ता करसाहास? काय काजे तुचो बेटामन के मोचो ले आगर मान करसीस? तुमी मोचो इसराएली रयत चेगालो जतरामन ले नंगत ले नंगत मास खाउन भुसका होयसाहास’? 30 एईकाजे इसराएल चो जहोवा महापरभु असन बलेसे: ‘मय आगे बलु रये, तुचो कुटुम आउर तुचो पुरखामन चो कुटुम मोचो पुरे अमदेया रदे’; मानतर एबे असन बलेसे, ‘एदांय असन नी होए; कसनबलले जोनमन मोचो मान करदे मय हुनमन के मान देयंदे, जोनमन मोके हिनस्ता समजदे मय हुनमन के हिनस्ता करेंदे। 31 सुन, हुन दिनमन एयसे, मय तुचो सकत आउर तुचो जुवानमन चो सकत के असन टुटायंदे कि तुचो कुटुम ने कोनी डोकरा नी होदे। 32 इसराएल चो कितलेई भलई होले बले मय अमदेया तुचो बिरुद ची रयंदे आउर तुचो कुटुम ने डोकरा होओतले कोनी नी बाचदे। 33 मय तुचो बंस चो सपाय लोगमन ले गोटोक मनुक के मोचो बेदी चो सेवा-बुता करतो काजे बचाउन रयंदे। हुन गागुन-गागुन मुरुसनाय रयदे, तुचो थर-लर आपलो जुवान समया ने ची मोरुन सरदे। 34 मोचो ए गोट चो एई चीना आय कि तुचो दुनो बेटामन होफनी आउर पीनेहास गोटकी दिने मोरदे। 35 मय मोचो काजे गोटोक पतेयातो लाईक पुजारी बनायंदे जोन मोचो मन आउर मोचो इछा हिसाब ले चलेदे आउर मय हुनचो कुटुम बड़ाउन हुनके चमकट करेंदे। हुन मोचो अबिसेक करलो राजा चो पुरे अमदेया सेवा करेदे। 36 आउर असन होयदे कि जोनमन बले तुचो कुटुम ने बाचुन रदे हुनमन मोचो बाछलो पुजारी लगे जाउन गोंदायक सोन-रूप काजे नोहले गोटोक रोटी काजे पांय पड़ुन बलदे, पुजारीपन चो बुता ने मोके बले पाड़ जेचोले मोके गोंदाएक रोटी मिरो’।”