जहोवा, समुएल के हागदेतोर
3
लेका समुएल, एली पुजारी संगे रउन जहोवा चो सेवा करते रये। हुन दिनमन ने, जहोवा लोगमन संगे कम गोटेयाते रये आउर कोनी-कोनी लोगमन के ची दरसन देते रये। 2 हुन दिनमन ने, एली चो आंईकमन झांवरी पड़ुन रये आउर काई लहाउक नी सकते रये। गोटोक दिने एली आपलो ओचना ने सोउन रये 3 आउर जहोवा चो मंदिर चो दिया नी लिबु रये। हुदलदांय समुएल जोन थाने जहोवा चो डोली रली हुन लगे लोंडुन रये। 4 तेबे जहोवा, समुएल के हागदिलो। समुएल बललो, “काय होली, काय काजे हागदिलीस?” 5 तेबे समुएल, एली लगे पराते जाउन बललो, “तुय तो मोके हागदिलीस, काय होली?” एली बललो, “मय तुके नी हागदेयें, जा सोउन रा।” तेबे हुन जाउन सोवलो। 6 जहोवा फेर समुएल के हागदेउन बललो, “ए समुएल!” तेबे समुएल उठुन फेर एली लगे गेलो आउर बललो, “तुय तो मोके हागदिलीस, काय होली?” तेबे एली बललो, “ए मोचो बेटा, मय तुके नी हागदेयें, जा, सोउन रा।” 7 हुन समया ने समुएल, जहोवा के नी जानते रये आउर जहोवा चो बचन के केबई नी सुनुन रये। 8 फेर तीसर हार जहोवा, समुएल के हागदिलो आउर समुएल उठुन एली लगे गेलो आउर बललो, “तुय तो मोके हागदिलीस, काय काजे आय?” तेबे एली जानलो कि समुएल के जहोवा हागदेयसे। 9 एईकाजे एली, समुएल के बललो, “जा, सोउन रा आउर हुन फेर तुके हागदिलो जाले तुय बल, ‘ए जहोवा सांग। मय, तुचो कमेया सुनेंसे’।” तेबे समुएल आपलो ओचना ने जाउन सोवलो।10 तेबे जहोवा, समुएल लगे उबा होउन आगे चो असन फेर हागदिलो, “ए समुएल, ए समुएल!” समुएल बललो, “मय, तुचो कमेया सुनेंसे, सांग।” 11 जहोवा, समुएल के बललो, “सुन, मय इसराएल ने गोटोक असन बुता करेंदे जेचोले सुनतो सपाय लोगमन के डर चेपायदे। 12 हुन दिने मय, एली चो कुटुम चो बिरुद बललो सपाय गोट के मूर ले धरुन सरतले पुरा करेंदे। 13 कसनबलले मय तो हुनके असन सांगलेसे कि हुनचो बेटामन चो ओधरम बुता किरता हुनचो कुटुम-लोग के अमदेया डंड देयंदे। एली आपलो बेटामन चो ओधरम बुतामन के जानते रये मानतर हुन, हुनमन के नी समजालो। 14 एईकाजे मय एली चो कुटुम चो बारे ने किरिया खादलेसे कि एली चो कुटुम करलो ओधरम बुता चो खेमा, काई जतरा नोहले भेंट ले केबई बले नी होये।” 15 समुएल बियान पाओतले सोउन रये आउर बियाने उठुन जहोवा चो मंदिर चो कपाटमन के उगड़ालो। समुएल, एली के आपलो दरसन दखलो गोट सांगतो काजे डरलो। 16 मानतर एली, समुएल के हागदेउन बललो, “ए मोचो बेटा समुएल।” समुएल बललो, “काय हुकुम आय?” 17 तेबे एली हुनके पूछलो, “जहोवा तुके काय गोट सांगलो, हुन गोट के मोचोले नी लुकाव। जोन बले हुन तुके सांगलोसे, हुताले काई बले तुय, मोचो ले लुकालिसीस जाले महापरभु तुके उसने डंड देओ नोहले, हुनचोले बले आगर डंड देओ।” 18 तेबे समुएल गोटोक-गोटोक करुन सपाय गोट हुनके सांगलो आउर काई बले हुनचोले नी लुकालो। एली बललो, “हुन तो जहोवा आय, हुनके जसन नंगत लागेसे, उसने करो।” 19 समुएल लंग-लंगा बाड़ते गेलो आउर जहोवा हुनचो संगे रलो आउर हुन, हुनचो कोनी गोट फोकाहा होउक नी दिलो। 20 दान सहर ले धरुन बेरसेबा सहर ने रतो सपाय इसराएलिमन जानला कि समुएल, जहोवा बाछलो सत-अगमजानी आय। 21 जहोवा, सीलोह ने समुएल के दखा दिलो पाछे, आपलो बचन बाटले हुनके हुता घन-घन दखा देते रलो।