4
समुएल बललो गोट सपाय इसराएलिमन लगे अमरली।जहोवा चो डोली के झीकुन नेतोर
तेबे इसराएलिमन, पलिस्तीमन ले जुद करतो काजे एबनेजर ने तमु गाड़ला आउर पलिस्तीमन अपेक सहर ने तमु गाड़ला। 2 पलिस्तीमन, इसराएलिमन चो बिरुद धाड़ी-धाड़ी होला आउर दुनो चो मंजी बड़े भारी जुद होली, इसराएलिमन जुद ने हारला। पलिस्तीमन, इसराएलिमन चो सेना चो चारक हजार मनुकमन के जुद भाटा ने ची मोरते मारला। 3 हुताले बाचलो इसराएलिमन आपलो तमुमन ने बोहड़ुन ईला। तेबे इसराएल चो धरम-सियानमन बलुक मुरियाला, “जहोवा आजी आमके पलिस्तीमन ले काय काजे हरालो? इआ, आमी जहोवा चो बायदा चो डोली के सीलोह ले मांगुन आनुवां कि हुन आमचो मंजी एउन आमके बयरीमन चो हाथ ले बचाओ।” 4 तेबे हुनमन, लोग पठाउन सीलोह ले करूबमन ने बसु सेनामन चो जहोवा चो बायदा चो डोली के आनला। महापरभु चो बायदा चो डोली संगे एली चो दुनो बेटामन होफनी आउर पीनेहास बले रला। 5 जहोवा चो बायदा चो डोली इसराएलिमन चो डेरा ने अमरतोके सपाय इसराएलिमन खुबे जोर ले चिचीयाला कि भुंय थरथरली। 6 असन चिचियातोके सुनुन पलिस्तीमन पूछला, “काय काजे इबरानीमन इतलो जोर ले चिचियायसोत?” तेबे हुनमन जानला, जहोवा चो डोली हुनमन चो डेरा ने ईलीसे। 7 तेबे पलिस्तीमन डरुन बलला, “हुनमन चो डेरा ने महापरभु ईलोसे।” फेर हुनमन बलला, “हाय! आमचो संगे असन केबई नी होउ रये। 8 हाय! असन सबुले सकत देव-धामी ले आमके कोन बचायदे? एई महापरभु तो मिसरेयामन उपरे सबु बरन चो बिपती आनु रये। 9 ए पलिस्तीमन, तुमी ढाढ़ुस करा, आपलो मनुक बल दखाहा, नोहले असन होयदे, जसन इबरीमन तुमचो तलेया ने रला उसने तुमी हुनमन चो तलेया होउन जाहासे। आपलो मनुक गुन दखाउन जुद करा।” 10 तेबे पलिस्तीमन जुद-भाटा ने गेला आउर इसराएलिमन के जुद ने हराला। एईकाजे इसराएलिमन आपलाहान डेरामन बाटे पराउक मुरियाला। हुनमन ले खुबे लोगमन मोरला, बललोने, तीस हजार इसराएली हिंडतो सेना मोरला। 11 फेर पलिस्तीमन महापरभु चो बायदा चो डोली के झीकुन नीला आउर एली चो दुनो बेटामन होफनी आउर पीनेहास के बले मोरते मारला।
एली चो मोरना
12 हुनी दिने, सेना थानो बिनयामीन बंस चो गोटोक मनुक आपलो फटई के चीरुन आउर मुंडे माटी रिकाय होउन पराते सीलोह ने अमरलो। 13 जेबे हुन मनुक अमरलो तेबे एली, महापरभु चो डोली चो बारे ने फिकिर करते रये। हुन, बाट रेटे आपलो गादी ने बसुन बाट दखते रये। जसन हुन मनुक सहर ने अमरुन हुन गोट के सांगलो, तेबे सहर चो सपाय लोगमन चिचियाउन गागुक मुरियाला 14 चिचियातोके सुनुन एली पूछलो, “लोगमन काय काजे असन चिचियाउन गागसोत?” तेबे हुन मनुक झटके जाउन एली के सपाय गोट सांगलो। 15 एली तो दुय कम सव बरक चो रये आउर हुनचो आंईक झांवरी पड़ु रये। एईकाजे हुन काई लहाउक नी सकते रये। 16 हुन मनुक एली के बललो, “मय जुद-भाटा ले आजी ची पराउन ईलेसे।” एली पुछलो, “ए मोचो बेटा, काय खबर आय?” 17 हुन बललो, “पलिस्तीमन जुद ने इसराएलिमन के हराला आउर खुबे इसराएलिमन के मोरते मारला। तुचो दुनो बेटामन होफनी आउर पीनेहास के बले मोरते मारला आउर महापरभु चो डोली के झीकुन नीला।” 18 महापरभु चो डोली चो नाव सुनते खन एली पुजारी देवड़ी लगे आपलो गादी ले चितखाउन घसरलो। हुन खुबे डोकरा होलो किरता आउर खुबे ठोसर रलो किरता हुनचो टोडरा टुटली आउर हुन मोरलो। चालीस बरक ले हुन, इसराएलिमन चो बाट-दखाउ रये।
पीनेहास चो बायले मोरतोर
19 एली चो बेटा पीनेहास चो बायले पेटे रये आउर हुनचो छर-फर होतो समया अमरु रये। जिदलदांय हुन, महापरभु चो डोली के झीकुन नीलो खबर आउर आपलो सतरा आउर मनुक चो मोरलो खबर सुनली, तेबे हुनके दुखा उठली। हुनके गोटोक बेटा होली। 20 हुनचो मोरतो बेरा हुनचो लगे उबलो बायलेमन हुनके बलला, “नी डर! तुय गोटोक बेटा पावलिसीस।” मानतर हुन काई नी बलली आउर कोचई गोट के धियान नी दिली। 21 “पलिस्तीमन, महापरभु चो डोली के झीकुन नीलो किरता आउर आपलो सतरा आउर मनुक मोरलो किरता ‘इसराएल ले महापरभु चो मयमा उठली’ बलुन हुन लेका-पिला चो नाव इकाबोद संगाली।” 22 फेर हुन बलली, “इसराएल ले महापरभु चो मयमा उठली। कसनबलले महापरभु चो डोली के झीकुन नीला।”