पलिस्तीमन चो देस् ने महापरभु चो डोली
5
पलिस्तीमन, महापरभु चो डोली के एबनेजर ले असदोद सहर ने नीला। 2 तेबे पलिस्तीमन, महापरभु चो डोली के दागोन देव चो मंदिर ने अमराउन दागोन देव चो मूरत लगे संगाउन दिला। 3 दुसर दिने असदोदीमन बड़े बियाने उठुन दागोन देव चो मूरत के, जहोवा चो डोली पुरे पाटा पड़ुन भुंये घसरलोर दखला। तेबे हुनमन दागोन देव चो मूरत के उठाउन हुनचेई ठान ने फेर मंडाउन दिला। 4 फेर तीसर दिने हुनमन बड़े बियाने उठुन दागोन देव चो मूरत के, जहोवा चो डोली पुरे पाटा पड़ुन भुंये घसरलोर दखला। दागोन देव चो मूरत चो मुंड आउर दुनो हाथ, मंदिर देवड़ी ने गोंदा होउन पड़ुन रये। सोजे धड़ ची बाचुन रये। 5 एईकाजे दागोन देव चो पुजारी आउर दागोन देव चो मंदिर ने जातो सपाय लोग असदोद ने दागोन देव चो मंदिर-दुआर चो देवड़ी ने एबतले पांय नी मंडाओत। 6 जहोवा चो हाथ असदोदीमन चो बिरुद होली आउर हुनमन के कटलाउक नी सकतो असन डंड दिलो आउर हुन असदोद आउर हुनचो लगे-लगे रतो लोगमन के उपकान बेमार करलो। 7 ए हाल के दखुन असदोद चो लोगमन बलला, “इसराएल चो महापरभु चो डोली आमचो मंजी नी रओ; कसनबलले जहोवा चो हाथ आमचो आउर आमचो दागोन देव उपरे बिपती पाड़लीसे।” 8 तेबे हुनमन पलिस्तीमन चो सपाय मुखियामन के हागदिला आउर हुनमन के पूछला, “आमी इसराएल चो महापरभु चो डोली के कसन करुआंव?” हुनमन बलला, “महापरभु चो डोली के गत सहर ने अमराउन दिया।” तेबे हुनमन इसराएल चो महापरभु चो डोली के गत सहर ने अमराउन दिला। 9 हुनमन जहोवा चो डोली के हुता अमरातोके जहोवा हुन सहर चो बिरुद होउन डंड दिलो। हुता खुबे गागा-बोगा होली; सहर चो नानी ले बड़े सपाय लोगमन के हुन उपकान बेमार पड़ालो। 10 तेबे हुनमन इसराएल चो महापरभु चो डोली के एकरोन सहर ने पठाला। महापरभु चो डोली एकरोन सहर ने अमरते खन एकरोनीमन असन बलुन चिचियाउक मुरियाला, “हुनमन, आमके आउर आमचो लोग के मोरातो काजे इसराएल चो महापरभु चो डोली के एता आनलासे।” 11 तेबे हुनमन पलिस्तीमन चो सपाय मुखियामन के रुंडाला आउर हुनमन के बलला, “इसराएल चो महापरभु चो डोली के निकराउन दियास, हुन आपलो ठान ने बोहड़ुन जाओ। तेबे हुन, आमके आउर आमचो लोगमन के नास नी करे।” हुन सहर ने तो मोरना चो डर चेपाउन रये आउर महापरभु चो हाथ हुनमन उपरे खुबे भारी पड़ली। 12 आउर मोरना ले बाचलो लोगमन उपकान ले बेमार पड़ु रओत। हुन सहर चो लोगमन चो गागा-बोगा बादरी लगे अमरली।