जहोवा चो डोली के आनतोर
6
जहोवा चो डोली, पलिस्तीमन चो देस् ने सात मयना रली। 2 तेबे पलिस्तीमन, पुजारीमन आउर जादु-टोनहामन* के हागदेउन पूछला, “जहोवा चो डोली के आमी कसन करुआंव? आमके सांगा, हुनके काय देउन हुनचो ठान ने पठाउंदे?” 3 हुनमन बलला, “तुमी इसराएल चो महापरभु चो डोली के हुता पठाउआहास जाले असने नी पठाहा, मानतर तुमी हुनचो काजे दोख-जतरा चेगाउन पठाहा, तेबे तुमी चेकरासे आउर जानासे कि हुन काय काजे तुमके डंड दिलो।” 4 पलिस्तीमन पूछला, “हुनचो पलटा आमी हुनके काय बरन चो दोख-जतरा चेगाउंदे?” हुनमन बलला, “पलिस्ती मुखियामन चो गनती हिसाब ने, सोन चो पांच ठन उपकान आउर सोन चो पांच ठन मूसा के दोख-जतरा चेगाहा; कसनबलले तुमके आउर तुमचो मुखियामन के गोटकी मरी होलीसे। 5 एईकाजे तुमी आपलो उपकान आउर तुमचो देस् के नास करतो मूसा चो मूरत घड़ुन, इसराएल चो महापरभु चो मयमा करा; तेबे कोन जाने हुन तुमचो ले, तुमचो देव-धामी ले आउर तुमचो देस् ले आपलो डंड चो हाथ के गुचायदे। 6 जसन मिसरेयामन आउर फिरोन आपलो मन के कटुर करला, उसने तुमी काय काजे आपलो मन के कटुर करसाहास? जेबे महापरभु अचरित बुतामन करुन हुनमन के डंड दिलो, तेबे काय हुनमन इसराएलिमन के जाउक नी दिला? आउर काय, हुनमन नी गेला? 7 एईकाजे एदांय तुमी गोटोक नवा गाड़ा बनाहा आउर दुय ठन गोरस देतो गायमन के आना, जोनमन के केबई नी जुआंड़लासे। हुन गायमन के गाड़ा ने जोवांड़ुन हुनमन चो पिलामन के अलगाउन घरे बोहड़ाउन दियास। 8 जहोवा चो डोली के गाड़ा ने संगाउन दिया, आउर सोन चो जोन तीजमन के तुमी दोख-जतरा काजे दियासे, हुनमन के झापी ने भोरुन हुनचेई संगे संगाउन दिया, आउर गाड़ा के जातो काजे बिदा करुन दियास। 9 आउर दखते राहा; हुन गाड़ा, आमचो देस् ले बेत-सेमेस ने गेली जाले आमी जानवां कि आमचो उपरे ए बिपती हुनचेई बाटले रली; आउर दुसर बाटे गेले आमी जानवां कि ए बिपती हुनचो बाटले नोआय; मानतर धोका ने असन होली।”10 हुन मनुकमन उसने ची करला बललोने, दुय ठन पिलाहारिन गायमन के गाड़ा फांदला, आउर हुनमन चो पिलामन के घरे ढाकला। 11 हुनमन जहोवा चो डोली के आउर सोन चो घड़लो मूसामन आउर उपकानमन संगालोर झापी के बले गाड़ा ने संगाला। 12 तेबे गायमन बेत-सेमेस चो बाट धरला, हुनमन उजा नोहले डेबरी बाटे नी जाउन बाटे-बाट गागते-गागते गेला; आउर पलिस्तीमन चो मुखियामन हुनमन चो पाट-पाट बेत-सेमेस चो संद अमरतले गेला।
13 बेत-सेमेस चो लोग आपलो बेड़ा ने गउं काटते रओत, हुनमन महापरभु चो डोली के दखुन खुबे हरिक होला। 14 हुन गाड़ा, जहोसू नाव चो गोटोक बेत-सेमेसी मनुक चो बेड़ा ने जाउन ठेबली। हुता गोटोक बड़े पकना रये; एईकाजे हुनमन गाड़ा चो फारा-खुटामन के दारु चीरला आउर गायमन के जहोवा काजे होम-जतरा चेगाला। 15 लेवीमन, जहोवा चो डोली आउर सोन चो तीजमन संगालो झापी के उतराउन हुनके बड़े पकना उपरे मंडाला। हुनी दिने, बेत-सेमेस चो लोगमन जहोवा काजे होम-जतरामन आउर मिला-मिसा जतरामन चेगाला। 16 एके दखुन पलिस्तीमन चो पांचझन मुखियामन हुनी दिने एकरोन ने बोहड़ुन गेला।
17 पलिस्तीमन आपलो दोख-जतरा काजे जहोवा पुरे चेगालो सोन चो उपकानमन आउर मूसामन, असदोद सहर, गाजा सहर, असकलोन सहर, गत सहर आउर एकरोन सहर बाटले गोटोक-गोटोक रली। 18 आउर हुन सोन चो मूसामन, पांचझन पलिस्ती मुखियामन चो हक चो सपाय सहरमन आउर गांवमन चो गनती हिसाब ने रये। जहोवा चो डोली मंडालो हुन बड़े पकना एबे बले बेत-सेमेसी जहोसू चो बेड़ा ने आसे।
19 बेत-सेमेस चो कोनी-कोनी लोगमन जहोवा चो डोली भीतरे ओंजारला, एईकाजे जहोवा, हुनमन ले तीन कोड़ी दस झन के मोरालो। तेबे लोगमन खुबे खिसियाला, कसनबलले जहोवा खुबे लोगमन के मोराउन रये। 20 तेबे बेत-सेमेस चो लोगमन बलला, “ए पवितर जहोवा महापरभु पुरे कोन उबा रउक सके? एके आमचो लगले कहां पठाउआंव बे?” 21 तेबे हुनमन किरयत-आरीम चो लोगमन लगे दूतमन चो हाथे असन खबर पठाला, “पलिस्तीमन जहोवा चो डोली के बोहड़ाउन दिलासोत, एईकाजे तुमी एउन हुनके तुमचो थाने निया।”