7
किरयत-आरीम चो लोगमन जाउन जहोवा चो डोली के गिबा ने आनला आउर अबीनादाब चो डोंगरी उपर चो घरे संगाला। जहोवा चो डोली चो सेवा-बुता काजे अबीनादाब चो बेटा एलियाजर के पवितर करुन अलगाला।समुएल, इसराएलिमन चो नियाव करतोर
2 किरयत-आरीम ने जहोवा चो डोली संगालोर खुबे दिन होली बललोने, बीस बरक होली। इसराएल चो सपाय कुटुम-लोगमन खिसियाउन-खिसियाउन जहोवा ले गुहारते रला। 3 तेबे समुएल, इसराएल चो सपाय कुटुम-लोगमन के बललो, “सते, तुमी आपलो समपुरन मन ले जहोवा बाटे बोहड़ासाहास जाले दुसर देव-धामीमन आउर असतोरेत देव-धामीमन के आपलो मंजी ले गुचाहा, आउर जहोवा बाटे मन लगाउन हुनचेई आराधना करा, तेबे हुन तुमके पलिस्तीमन चो हाथ ले छंडायदे।” 4 तेबे इसराएलिमन बाल देव आउर असतोरेत देव चो मूरतमन के पकाला आउर जहोवाचेई आराधना करुक मुरियाला।
5 तेबे समुएल बललो, “सपाय इसराएलिमन के मिसपा ने रूंडाहा, मय तुमचो काजे जहोवा ले पारथना करेंदे।” 6 तेबे हुनमन मिसपा ने रूंडला, आउर पानी भोरुन जहोवा पुरे रिकाला। हुन दिने हुनमन उपास रला आउर असन बलला, “आमी जहोवा चो बिरुद पाप करलुसे”। समुएल, मिसपा ने इसराएलिमन चो बाट दखाउ रलो।
7 इसराएलिमन मिसपा ने रूंडलासे बलुन पलिस्तीमन सुनला, तेबे हुनमन चो मुखियामन इसराएलिमन ले जुद करुक गेला, एके सुनुन इसराएलिमन, पलिस्तीमन ले खुबे डरला। 8 इसराएलिमन, समुएल के बलला, “तुय आमचो काजे जहोवा महापरभु ले गुहारते ची रा, नोहले हुन आमके पलिस्तीमन ले नी बचायदे।” 9 तेबे समुएल गोटोक गोरस खातो मेंडा पिला के जहोवा काजे समपुरन होम-जतरा चेगालो आउर इसराएलिमन काजे जहोवा ले गुहारलो, तेबे जहोवा हुनचो गुहार के सुनलो। 10 समुएल होम-जतरा चेगातो बेरा, पलिस्तीमन, इसराएलिमन ले जुद करतो काजे लगे अमरला, हुनी दिने जहोवा पलिस्तीमन चो बिरुद बादरी चड़लाउन खुबे डरालो किरता हुनमन आंदा-गुपा होला, आउर हुनमन इसराएलिमन ले हारला। 11 तेबे इसराएली मनुकमन मिसपा ले निकरुन पलिस्तीमन के खेदला, आउर हुनमन के बेत-कार अमरतले खेदुन-खेदुन मोरते मारला।
12 तेबे समुएल गोटोक पकना धरुन मिसपा आउर सेन चो मंजारे उबालो, आउर “जहोवा ए लगले आमचो साहरा करलोसे” बलुन हुनचो नाव एबनेजर* संगालो। 13 तेबे पलिस्तीमन डरला आउर इसराएलिमन चो देस् ने फेर नी गेला। समुएल चो जीवता जीव भर जहोवा चो हाथ पलिस्तीमन चो बिरुद रली। 14 एकरोन आउर गत लगले जोन सहरमन के पलिस्तीमन, इसराएलिमन ले झिकुन रला, हुन सपाय सहरमन फेर इसराएलिमन चो हक ने होली; आउर आपलो आली-पाली चो देस् के बले इसराएलिमन, पलिस्तीमन ले छंडाला। इसराएलिमन आउर एमोरेयामन चो मंजी ने बले अस्तिर रये।