इसराएलिमन आपलो काजे गोटोक राजा मांगतोर
8
समुएल डोकरा होलो के आपलो बेटामन के इसराएलिमन चो बाट दखाउमन बनालो। 2 हुनचो पईलात बेटा जोएल आउर दुसर बेटा अबियाह रये। हुनमन बेरसेबा ने नियाव करते रओत। 3 मानतर समुएल चो बेटामन हुनचो असन नी चलोत, हुनमन लालच करुन घूस धरते रओत आउर फंद नियाव करते रओत।4 तेबे इसराएल चो सपाय धरम-सियानमन रूंडा होला आउर समुएल रतो रामा सहर ने जाउन 5 हुनके बलला, “सुन, तुय तो एदांय डोकरा होलीस आउर तुचो बेटामन तुचो बाट ने नी चलोत। एदांय आमके बाट दखातो काजे जात-जात चो लोगमन चो नीती असन, आमचो काजे बले गोटोक राजा बाछुन देस।” 6 हुनमन चो एई गोट, “आमचो नियाव करतो काजे गोटोक राजा बाछुन देस,” समुएल के अडरा लागली आउर समुएल जहोवा ले पारथना करलो। 7 जहोवा, समुएल के बललो, “हुनमन जोन बले तुके बलसोत हुनके मान; कसनबलले हुनमन तुके नाई, मानतर मोके छांडलो आउर मोके आपलो राजा नी मानेसोत। 8 मय हुनमन के मिसर देस् ले निकराउन आनलो दिन ले धरुन आजी बले, जसन हुनमन मोके छांडुन दुसर देव-धामी चो सेवा-बुता करसोत, उसने ची हुनमन तुचो संगे बले करसोत। 9 एदांय तुय हुनमन चो गोट मान; मानतर हुनमन के चेतानी देउन नंगत ले समजाव, जोन राजा हुनमन उपरे राज करेदे हुन, हुनमन संगे कसन बेबार करेदे।”
10 तेबे समुएल, राजा मांगतो लोगमन के जहोवा चो सपाय बचनमन सांगलो। 11 हुन बललो, “काय, तुमचो उपरे राज करतो राजा, आपलो मन-इछा असन बेबार नी करेदे? काय, हुन तुमचो बेटामन के जुद बेरा आपलो रथ चलाउमन आउर घोड़ा-सुवारमन नी बनायदे? आउर हुनमन के हुनचो रथमन चो पुरे-पुरे पराउक पड़ेदे। 12 फेर काय हुन, हुनमन के दुसर-दुसर बुतामन ने हजार-हजार आउर पचास-पचास लोगमन चो मुखिया नी बनायदे? काय, खुबे लोग के आपलो बेड़ा-खाड़ामन ने नांगर जोपायदे आउर आपलो बेड़ा-खाड़ामन चो फसल नी कटायदे? काय हुन, हुनमन के आपलो काजे जुद चो हतियार आउर रथ चो सजमन बनाउक नी बलेदे? 13 काय हुन, तुमचो बेटीमन के बास-तेल आउर रोटी बनाउमन आउर रंदारी नी बनायदे? 14 काय हुन, तुमचो बेड़ा-खाड़ामन आउर अंगुर-पदरमन आउर सबुले नंगत जयतून रूकमन के धरुन आपलो माहाल चो सेवकमन के नी देयदे? 15 काय हुन, तुमचो अरन आउर अंगुर-पदर चो उबज चो दसवां बाटा के बले धरुन आपलो राजपालमन आउर सेवा करुमन के नी देयदे? 16 फेर काय, हुन तुमचो कमेया-कमेयीन, नंगत-नंगत गाय-बयलामन आउर गदाहामन के नेउन आपलो बुता नी करायदे? 17 हुन तुमचो छेरी-मेंडीमन चो बले दसवां बाटा धरेदे, असन बरन ले तुमी हुनचो कमेया होउन जाहासे। 18 हुनी दिनमन ने तुमी आपलेई बाछलो राजा किरता गाग-गगरीही होउन जहोवा ले गुहारासे, मानतर जहोवा तुमचो गुहार नी सुनेदे।”
इसराएलिमन काजे राजा बाछतोर
19 मानतर हुनमन समुएल चो गोट के नी धरला; आउर बलला, “नाई! आमचो उपरे राज करतो काजे गोटोक राजा बाछुन देस, 20 तेबे आमी बले जात-जात चो लोगमन असन होउंदे, आउर आमचो राजा आमचो उपरे नियाव करो आउर जुद बेरा आमचो पुरे-पुरे जाउन आमचो बाटले लड़ो।” 21 लोगमन चो ए सपाय गोटमन के सुनुन समुएल, हुन गोटमन के जहोवा के सांगलो। 22 जहोवा, समुएल के बललो, “हुनमन चो गोट के मानुन हुनमन काजे गोटोक राजा बाछुन देस।” तेबे समुएल, इसराएलिमन के बललो, “तुमी सपाय आपलाहान सहरे जाहा।”