साउल, समुएल के भेटतोर
9
बिनयामीनी बंस ने कीस नाव चो गोटोक सवकार मनुक रये। कीस, अबीएल चो बेटा, सरोर चो नाती आउर बकोरत चो पुती रये आउर बकोरत चो बुआ अपीह रये। 2 कीस के साउल नाव चो गोटोक सुंदर जुवान बेटा रये, आउर इसराएलिमन ने हुनचो इतलो सुंदर कोनी नी रला; हुन इतलो डेंग रये कि सपाय लोग हुनचो खांदक होते रओत।3 गोटोक दिने, साउल चो बुआ कीस चो गदईमन हाजला, तेबे कीस आपलो बेटा साउल के बललो, “गोटोक कमेया के तुचो संगे ने आउर गदईमन के डगराउन आन।” 4 तेबे साउल आउर हुनचो कमेया एपरेम चो डोंगरी परघन आउर सलीसा देस् बाटले डगराते-डगराते गेला, मानतर गदईमन के नी भेटला। तेबे हुनमन सालीम नाव चो देस् बाटले डगराते गेला, मानतर हुता बले गदईमन के नी भेटला। फेर बिनयामीनीमन चो देस् ने गेला, मानतर हुता बले गदईमन के नी मिराला।
5 जिदलदांय हुनमन सूफ देस् ने अमरला, तेबे साउल आपलो संग चो कमेया के बललो, “आव, आमी बोहड़ुन जो नोहले मोचो बुआ, गदईमन चो फिकिर छांडुन आमचो काजे फिकिर करते रयदे।” 6 मानतर हुनचो कमेया हुनके बललो, “सुन, ए सहर ने महापरभु चो गोटोक सेवक आसे, सपाय लोग हुनके खुबे इजित-मान करुआत, आउर हुनचो बललो गोट कटु ची आय। एदांय आमी हुनचो लगे जो, हुनी आमके सांगुक सके आमके कोन बाटे जातोर आय।” 7 साउल आपलो कमेया के बललो, “सुन, आमी हुनचो लगे गेलु जाले हुनचो काजे काय नेवां? दख, आमचो मोंडरा चो रोटीमन सरली, आउर महापरभु चो सेवक के भेंट देतो काजे आमचो लगे काई नीआय। आमी हुनके काय देवां?” 8 कमेया, साउल के फेर बललो, “मोचो लगे सोजे रूपा चो गोटकीचे सिक्का* आसे, एके मय महापरभु चो सेवक के देयंदे, तेबे हुन आमके सांगेदे, आमके केंव जातोर आय।” 9 (आगे-जुगे इसराएल ने कोनी मनुक के, महापरभु चो मन-इछा जानतोर आय जाले असन बलते रओत, “जो, आमी दरसी* लगे जो,” एबे जेके अगमजानी बलसोत हुनके आगे-जुगे दरसी बलते रओत।) 10 तेबे साउल आपलो कमेया के बललो, “हव, तुय सते बलसीस, आव जो।” आउर हुनमन महापरभु चो सेवक रतो सहर ने गेला।
11 हुन सहर चो डेंग ठाने चेगतो बेरा हुनमन खुबे लेकीमन के भेटला, हुन लेकीमन पानी दुआरुक जाते रओत, हुनमन लेकीमन के पूछला, “काय, दरसी एताय आसे?” 12 लेकीमन बलला, “हव आसे। दखा! हुन तुमचो ले पुरे जायसे, झटके जाहा, आजी डेंग ठान चो बेदी ने लोगमन जतरा करसोत, एईकाजे हुन आजी सहरे ईलोसे। 13 तुमी सहरे अमरते खन, हुन डेंग ठान ने खाउक जातो ले आगे हुनके भेटासे, कसनबलले हुनचो अमरतो ले आगे कोनी नी खाओत। जतरा काजे हुनी धन-धन करुआय, हुनचो पाछे ची नेवतलो लोग खाउआत। एईकाजे एदांय झटके जाहा, तेबे तुमी हुनके भेटासे।” 14 हुनमन सहरे अमरला, हुदलीदांय समुएल डेंग ठान चो बेदी लगे जातो काजे हुनमन चो पुरे ले एते रये।
15 साउल, सहर ने एतो ले गोटोक दिन आगे जहोवा, समुएल के असन सांगुन रये; 16 “काली के इदलीदांय मय तुचो लगे बिनयामीन देस् चो गोटोक मनुक के पठायंदे। हुनके तुय, मोचो इसराएली रयत चो राजा होतो काजे अबिसेक कर। हुन मोचो रयत के पलिस्तीमन ले बचायदे। कसनबलले मय हुनमन चो गुहार के सुनलेसे आउर मोचो रयत चो दुख-डंड के दखलेसे।” 17 जिदलदांय समुएल, साउल के दखलो, तेबे जहोवा हुनके बललो, “जोन मनुक चो बारे ने मय तुके सांगुन रयें, ए हुनी मनुक आय, जोन मोचो रयत उपरे राज करेदे।” 18 तेबे साउल सहर-देवड़ी लगे समुएल के भेटलो आउर बललो, “मोके सांग, दरसी चो घर कोन बाटे आसे?” 19 समुएल, साउल के बललो, “मय ची दरसी आंय, मोचो पुरे-पुरे डेंग ठान ने चेग, कसनबलले आजी तुय मोचो संगे खासे, आउर जोन बले तुचो मने आसे, बियाने तुके सांगुन बिदा करेंदे। 20 तुचो तीन दिन ले हाजलो गदईमन चो फिकिर नी कर, कसनबलले हुनमन मिरला। एदांय इसराएल चो आसा तुचो आउर तुचो बुआ चो कुटुम उपरे आय। (इसराएलिमन आपलो उपरे राज करतो काजे तुके मन करलासोत)।” 21 साउल बललो, “मय तो इसराएली बंसमन ले सपाय ले नानी बिन्यामीन बंस चो आंय आउर मोचो कुटुम बिनयामीन बंस ने सपाय ले नानी कुटुम आय। फेर तुय काय काजे मोके असन गोटमन सांगसीस?”
22 तेबे समुएल, साउल आउर हुनचो कमेया के गोटोक बड़े बाकरा ने नीलो जोन थाने तीसक झन नेवतलो लोग रला। हुताय हुनमन के खास ठान ने बसालो। 23 समुएल, रंदारी के बललो, “जोन मास के मय तुके अलगाउन संगातो काजे सांगुन रले, हुनके आन।” 24 तेबे रंदारी, जांग के मास संगे आनुन साउल पुरे मंडाउन दिलो, तेबे समुएल, साउल के बललो, “तुचो काजे अलगाउन संगालो मास के खा, जोन तुचो पुरे मंडालोर आसे। कसनबलले मय लोगमन के कबूल धरालो समया ने तुचो संगे खातो काजे नेवतलेसे।”
साउल हुन दिने समुएल संगे खादलो। 25 तेबे हुनमन डेंग ठान ले उतरुन सहरे ईला आउर घर चो छत उपरे समुएल, साउल संगे गोटेयालो आउर साउल हुताय सोवलो।
26 बड़े बियाने समुएल छत उपरे जाउन साउल के हागदेउन बललो, “उठ, मय तुके बिदा देयंदे।” तेबे साउल उठलो आउर हुन, समुएल संगे बाहरे निकरलो। 27 सहर चो संद लगे अमरतोदांय समुएल, साउल के बललो, “तुचो कमेया के आमचो ले पुरे जातो हुकुम देस। (तेबे हुन पुरे गेलो) मानतर तुय मोचो संगे रा, कसनबलले मय तुके महापरभु चो बचन सुनायंदे।”