समुएल, साउल के राजा बनातो काजे अबिसेक करतोर
10
तेबे समुएल गोटोक कुपी ने तेल धरुन साउल चो मुंडे रिकालो आउर हुनके पोटारुन बललो, “जहोवा आपलो रयत उपरे राज करतो काजे तुके अबिसेक करलोसे। 2 आजी जिदलदांय तुय मोचो लगे ले जासे तेबे बिनयामीन परघन चो संद सेलसह ने, राहेल चो मोट लगे तुके दुय झन मनुकमन भेट होदे। हुनमन तुके बलदे, ‘जोन गदईमन के तुय डगराउक जाउ रलीस, हुनमन मिरला, तुचो बुआ गदईमन चो फिकिर छांडुन तुमचो फिकिर करुन बलेसे, मोचो बेटा के भेटतो काजे मय काय करेंदे बे?’ 3 फेर तुय हुता ले जाउन ताबोर चो बांज रूक लगे तीनझन मनुक के बेतेल ने महापरभु चो आराधना करुक जातोके भेटसे। हुनमन ले एकलो, तीन ठन छेरी-पिलामन दुसर, तीन ठन रोटी आउर तीसर, गोटोक कोंडी अंगुर-रस धरुन रदे। 4 हुनमन तुके भेटुन हाल पुछदे, आउर दुय ठन रोटी देदे, तुय हुनके धर। 5 फेर तुय महापरभु चो डोंगरी* ने अमरसे, जोन थाने पलिस्ती सेना चो तमु-भाटा आसे। जेबे तुय हुन सहर ने अमरसे, तेबे अगमजानीमन चो गोहड़ी के किंदरी बाजा, डफली, बांवसी, आउर सारंगी बाजा बजाउन-बजाउन डेंग ठान चो मंडली ले उतरतो के दखसे, हुनमन अगमगोट बलते रदे। 6 तेबे जहोवा चो आत्मा तुचो उपरे सकत ले उतरेदे, तुय हुनमन संगे अगमगोट बलुक मुरियासे आउर तुय बदलुन नवा मनुक होउन जासे। 7 जिदलदांय ए चीनामन पुरा होयदे, तेबे जोन बले करतो मोहका तुके मिरेदे, हुनके कर। कसनबलले महापरभु तुचो संगे रयदे। 8 तुय मोचो ले आगे गिलगाल ने जा, मय होम-जतरा आउर मिला-मिसा जतरा चेगाउक तुचो लगे एयंदे। तुय सात दिनतले मोचो बाट दखते रा, तेबे मय एउन तुके सांगेंदे तुके काय करतोर आय।”9 साउल, समुएल लगले निकरते खन महापरभु साउल चो मन के नवा करलो; आउर हुनी दिने सपाय चीनामन पुरा होली। 10 साउल आउर हुनचो कमेया, गिबा लगे अमरतोके अगमजानीमन चो गोहड़ी हुनके भेटला। महापरभु चो आत्मा हुनचो उपरे सकत ले उतरली आउर साउल हुनमन संगे अगमगोट बलुक मुरियालो। 11 साउल के आगे ले जानतो लोगमन, साउल के अगमजानीमन संगे अगमगोट बलतो के दखुन गोटोक-दुसर ले बलुक मुरियाला, “ए कीस चो बेटा के काय होली? काय साउल बले अगमजानी होलो?” 12 हुता चो गोटोक मनुक पुछलो, “हुनमन चो बुआ कोन आय?” “काय, साउल बले गोटोक अगमजानी आय?” आउर ए गोट गोटोक सुआंग बनली। 13 अगमगोट बलुन सारलोके साउल घरे गेलो।
14 तेबे साउल चो काका, साउल आउर हुनचो कमेया के पूछलो, “तुमी कहां जाउन रलास?” साउल बललो, “आमी गदईमन के डगराउक जाउन रलु, मानतर आमके कहांय नी मिरला, एईकाजे आमी समुएल लगे गेलु।” 15 साउल चो काका पुछलो, “मोके सांगा, समुएल तुमके काय बललो?” 16 साउल बललो, “हुन आमके गदईमन मिरला बलुन सांगलो।” मानतर राजा बनतो चो बारे ने जोन गोट समुएल सांगुन रलो, हुनके साउल, आपलो काका के नी सांगलो।
राजा बनलोके साउल चो परघाव
17 समुएल, इसराएलिमन के मिसपा ने जहोवा पुरे हागदिलो, 18 आउर हुनमन के बललो, “इसराएल चो जहोवा महापरभु असन बलेसे, ‘मय इसराएलिमन के मिसर देस् ले निकराउन आनले आउर तुमके मिसरेयामन ले आउर तुमके डाटा-टेवा करतो सपाय राजमन ले छंडाले’। 19 मानतर आजी तुमी, आपलो महापरभु के छांडलास जोन तुमके सपाय बिपती आउर दुख-तकलीस ले बचाउ रये, आउर ‘नाई, आमचो काजे राजा बनाउन देस’ बललास। एईकाजे एदांय तुमी बंस-बंस आउर कुटुम-कुटुम हिसाब ले जहोवा पुरे उबा होआ।”
20 समुएल, इसराएली बंस चो सपाय लोगमन के रूंडालो, आउर बिनयामीन बंस चो नाव ने चिटी निकरली। 21 तेबे हुन, बिनयामीन बंस चो सपाय कुटुम-लोगमन के रूंडालो आउर मतरी चो कुटुम चो नाव ने चिटी निकरली, सरासरी ने हुन, मतरी कुटुम चो सपाय मनुकमन के रूंडालो आउर कीस चो बेटा साउल चो नाव ने चिटी निकरली। मानतर हुनके डगरातो के हुता नी दखा दिलो। 22 तेबे हुनमन फेर जहोवा के पूछला, “काय, साउल एता ईलोसे?” तेबे जहोवा बललो, “दखा, हुन मोंडरा-गडरामन चो आड़े लुकलोसे।” 23 तेबे हुनमन पराते जाउन हुनके हुता ले आनला आउर हुन, लोगमन चो मंजी उबलो, हुन इतलो डेंग रये कि लोगमन हुनचो खांदक होते रओत। 24 समुएल सपाय के बललो, “काय तुमी जहोवा चो बाछलो राजा के दखसाहास? सपाय लोग ने हुनचो कटार कोनी नीआत।” तेबे सपाय लोगमन जोर ले चिचियाउन बलला, “राजा जुग-जुग जीओ!”
25 तेबे समुएल लोगमन के राजपाट चो नीती-नियम सांगलो, आउर हुनके किताप ने लिखुन जहोवा पुरे मंडालो। फेर समुएल सपाय लोगमन के आपलाहान घरे जातो काजे बिदा करलो। 26 साउल गिबा ने आपलो घरे गेलो, आउर हुनचो संगे गोहड़ायेक बीरमन बले गेला, जोनमन के हुनचो पाटेया होतो काजे महापरभु उकसाउन रये। 27 मानतर कोनी-कोनी उबागरी लोगमन बलला, “ए मनुक आमचो रखेया कसन ने करुक सकेदे?” हुनमन हुनके हेला समजला, आउर हुनचो काजे काई भेंट नी आनला, फेर बले हुन, हुनमन चो गोट के पाटसुना करुन ओगाय रलो।