2 सामुएल
साउल मोरतो खबर दाउद के मिरतोर
1
साउल मोरलो पाछे, दाउद अमालेकीमन के हराउन बोहड़लो आउर दुय दिन सिकलग ने रलो। 2 तीसर दिने, साउल चो तमु-भाटा ले गोटोक मनुक पराउन ईलो, हुनचो फटई चीरी होउन रये आउर मुंडे धुरला रये। हुन दाउद लगे अमरुन भुंये पाटा पड़ुन हुनके डंडासरन करलो। 3 दाउद हुनके पूछलो, “तुय कहां ले ईलीसीस?” हुन, दाउद के बललो, “मय इसराएलिमन चो तमु-भाटा ले बाचुन पराउन ईलेसे।” 4 दाउद हुनके पूछलो, “हुता काय होली? मोके सांग।” हुन बललो, “लोगमन जुद-भाटा के छांडुन पराला, खुबे लोग मोरला; साउल आउर हुनचो बेटा जोनातान बले मोरला।” 5 दाउद हुन खबर सांगु जुवान के पूछलो, “तुय कसन ने जानलीस, साउल आउर हुनचो बेटा जोनातान मोरला?” 6 खबर सांगु जुवान बललो, “मय हुदलदांय गिलबो डोंगरी ने रले आउर दखले, साउल आपलेई भाला ने टेकाय होउन रये; रथ सुवार आउर घोड़ा सुवारमन हुनके मारतो काजे लगे अमरु रओत। 7 हुन पाटकुती दखलो आउर मोके हागदिलो। मय हुनके पूछले, ‘काय हुकुम आय’? 8 हुन मोके पूछलो, ‘तुय कोन आस?’ मय हुनके बलले, ‘मय गोटोक अमालेकी आंय’। 9 हुन मोके बललो, ‘मोचो लगे एउन मोके मार; मोके तो खुबे पावलीसे आउर मांज धरेसे, मानतर जीव नी जायसे’। 10 तेबे मय पक्का जानले, हुनके खुबे पावलो किरता हुन बाचुक नी सके, एईकाजे मय हुनके मारले; मय हुनचो मुकुट आउर बांहटा के निकराउन एता मोचो परभु लगे आनलेसे।”11 तेबे दाउद आपलो फटई के चीरलो; आउर हुनचो संगे रलो सपाय मनुकमन बले उसने ची करला। 12 हुनमन, साउल, हुनचो बेटा जोनातान, जहोवा चो रयत आउर इसराएल चो कुटुम काजे सांज होओतले करलाउन खुबे गागला आउर काई नी खादला। कसनबलले हुनमन के खांडा ले मारुन रओत। 13 दाउद फेर हुन खबर सांगु जुवान के पूछलो, “तुय कहां चो आस?” हुन बललो, “मय तो परदेसिया चो बेटा, गोटोक अमालेकी आंय।” 14 दाउद हुनके पुछलो, “काय, तुय जहोवा अबिसेक करलो मनुक के मारतो काजे नी डरलीस?” 15 तेबे दाउद गोटोक जुवान के हागदेउन बललो, “जा, हुनके मोरते मार।” तेबे हुन जुवान हुनके खांडा ले मोरते मारलो। 16 दाउद हुनके बललो, “तुचो लोउ तुचेई उपरे पड़ो, कसनबलले तुय आपलेई गवई दिलीस, ‘जहोवा अबिसेक करलो मनुक के मय मारलेसे’।”
साउल आउर जोनातान काजे दाउद चो करलानी गीत
17 साउल आउर हुनचो बेटा जोनातान काजे दाउद, करलानी गीत गावलो। 18 (हुन, जहूदा ने रतो सपाय लोग के ए धनु-गीत सिखातो हुकुम दिलो; ए गीत, जासर नाव चो किताप ने लिखलोर आसे।) हुन बललो:
19 ए इसराएल, तुचो राजा डोंगरी ने मोरुन पड़लोसे!
कसन ने बीरमन घसरला!
20 गत सहर ने ए गोट के नी सांगा,
आउर असकलोन चो बाटमन ने डारा नी पेटाहा;
नोहले पलिस्ती बायलेमन हरिक होदे,
आउर खतना नोहलो लोग चो बेटीमन उदीम मनादे।
21 ए गिलबो चो बड़े-बड़े डोंगरीमन,
तुमचो उपरे ओस आउर पानी नी घसरो,
नोहले खुबे उबज देतो बेड़ा-खाड़ामन नी रओत!
कसनबलले हुताय बीर चो ढाल जहाला होउन रये,
आउर फेर केबई साउल चो ढाल ने तेल नी घसला।
22 बयरीमन चो लोउ नी बोहालोर
आउर बीरमन के नी मारलोर
जोनातान चो धनु नी बोहड़ली,
आउर साउल चो खांडा चुचाय नी एये।
23 साउल आउर जोनातान खुबे मया ने आउर गोटकी सोर ने रला!
आउर आपलो जीवना-मोरना ने बले संगे रला;
हुनमन सारंया ले बले आगर रोस
आउर बीजापुलिया-बाग ले बरसक रओत।
24 ए इसराएल चो बायलेमन, साउल काजे गागा,
हुन तुमके खुबे मोल चो लाल फटई देते रये,
आउर तुमके सोन चो गहना-गुटा पींदाते रये।
25 कसन ने बीरमन
जुद ने घसरला!
जोनातान डोंगरी ने मोरुन पड़लो।
26 ए मोचो भाई जोनातान, मय तुके सूरता करुन डाहाल-बिकाल होयंसे;
तुय मोचो काजे खुबे मया चो रलीस;
मोचो उपरे तुचो मया
बायलेमन चो मया ले बले आगर अचरित रली।
27 कसन ने बीरमन घसरला!
आउर जुद चो हतियारमन कसन ने नास होली!