एजरा
आगे एके पढ़ा
एजरा चो किताप ने, बेबिलोन चो राजा कयदी बनाउन नीलो जहूदीमन के एजरा, जरूसलेम ने बोहड़ाउन आनतो गोट चो बारे ने लिखलोर आसे। ई.पू 539 ने फारस चो कुसरु राजा बेबिलोन के हरालो आउर हुनचो राजपाट चो दुसर बरक ने, जरूबाबेल चो दखा-राखा ने कयद ने रलो जहूदीमन के पईल हार जरूसलेम ने बोहड़ाउन आनला। चार कोड़ी एक बरक पाछे, ई.पू 458 ने अरतछतर राजा, राज करतो सातवां बरक ने एजरा चो दखा-राखा ने (एजरा 7:7) कयद ने रलो बाचलो जहूदीमन के दुसर हार बोहड़ाउन आनला। आउर तेरा बरक पाछे, ई.पू 445 ने अरतछतर राजा राज करतो बीसवां बरक ने, नेहेमियाह चो दखा-राखा ने (नहेमी 2:1) कयद ने रलो बाचलो जहूदीमन के जरूसलेम ने बोहड़ाउन आनला।
ए किताप ने, जहूदीमन जरूसलेम ने फेर ले नंगत जीवना जीवतोर आउर महापरभु चो मंदिर के जतनाउन हुता सेवा-बुता करुक मुरियालो गोट आसे।
एजरा, महापरभु चो नियम-कानुन चो बारे ने खुबे जानते रये। हुन, लोगमन के धारनिक बनातो काजे साहरा करलो, जेचोले हुनमन नंगत जीवना जीवतो सिखिया के नी भुलकोत।