दाउद, इसराएल आउर जहूदा रयतमन चो गनती करातोर
24
जहोवा इसराएलिमन के फेर रीस होलो आउर हुनमन चो पाप किरता दाउद के उकसाउन बललो, “जा, इसराएल आउर जहूदा चो लोगमन चो गनती धर।” 2 एईकाजे राजा हुनचो लगे रलो जोआब आउर सेना-मुखियामन† के बललो, “तुमी दान ले धरुन बेरसेबा लगले रतो सपाय इसराएली बंस बाटे बुला आउर रयतमन चो गनती धरा। तेबे मय जानेंदे रयतमन चो गनती कितलो आसे।” 3 जोआब राजा के बललो, “रयतमन कितलेई बले रओत, तुचो महापरभु जहोवा हुनमन के सव गुना बड़ाओ आउर मोचो परभु राजा एके आपलो आंईक ले दखुक सको। मानतर ए मोचो परभु, ए राजा, तुय असन करतो मन काय काजे करसीस?” 4 तेबले बले राजा, जोआब आउर सेना मुखियामन के हुकुम दिलो। एईकाजे जोआब आउर सेना मुखिया, इसराएल चो लोगमन गनती धरतो काजे राजा चो पुरे ले निकरला। 5 हुनमन जरदन के नाहकुन गनती धरतो बुता अरोएर सहर आउर घाटी मंजी चो सहर ले मुरियाला, आउर गाद बाटले जाजेर सहर बाटे गेला। 6 हुताले हुनमन गिलाद ने आउर हितीमन चो राज कादेस ने गेला, फेर दान सहर ने गेला आउर हुन बाटले किंदरुन सीदोन ने अमरला। 7 तेबे हुनमन सोर नाव चो चमकट भाड़ा ने आउर हिव्वी आउर कनानीमन रतो सपाय सहरमन ने गेला। हुनमन जहूदा परघन चो बेर-उदिया उजा बाट चो देस बाटले बेरसेबा सहर ने गेला। 8 असने सपाय देसमन ने बुलुन-बुलुन हुनमन नव मयना आउर बीस दिन पाछे जरूसलेम ने अमरला। 9 तेबे जोआब, रयतमन चो गनती जोड़ुन राजा के सांगलो। इसराएल ने खांडा चलातो लाईक आठ लाख पलटनमन रला। आउर जहूदा ने पांच लाख पलटनमन रला।जहोवा, दाउद के डंड देतोर
10 रयतमन चो गनती धरलो पाछे, दाउद चो मन बाय-बिकाल होली। फेर दाउद जहोवा के बललो, “असन बुता जेके मय करलेंसे हुन खुबे बड़े पाप आय। एदांय ए जहोवा, आपलो कमेया चो ओधरम के गुचाव; कसनबलले मय मूरक बुता करलेसे।” 11 बियाने, जिदलदांय दाउद उठलो हुदलदांय दाउद चो अगमजानी गाद लगे जहोवा चो गोट अमरली, 12 “जाउन दाउद के बल, जहोवा असन बलेसे, ‘मय तुके तीन ठन बिपती दखायंदे, हुता ले तुय गोटोक के बाछ। हुन बिपती के मय तुचो उपरे पाड़ेंदे’।” 13 फेर गाद, दाउद लगे जाउन ए खबर दिलो आउर हुनके पूछलो, “तुचो देस् ने तीन बरक† काजे भूक पड़ेदे, नोहले तीन मयना तुचो बयरीमन तुके खेदते रदे आउर तुय हुनमन ले पराते रसे। नोहले तीन दिनतले तुचो देस् ने मरी पहटेदे। एदांय बिचार कर कि मय आपलो पठालो बीता के काय सांगुआय?” 14 दाउद, गाद के बललो, “मय खुबे गराहां ने पड़लेसे आमी जहोवा चो हाथ ने पड़ुंदे। कसनबलले, हुन दया करु आय। मानतर मोके मनुकमन चो हाथे पड़ुक नी होओ।”
15 तेबे जहोवा, हुनी दिन बियान ले धरुन कबूल धरालो समया ले इसराएलिमन ने मरी पहटालो, आउर दान ले धरुन बेरसेबा लगले रतो रयतमन ने सतर हजार मनुकमन मोरुन गेला। 16 मानतर जिदलदांय जरूसलेम के सत्यानास करतो काजे सरगदूत आपलो हाथ लमालो तेबे जहोवा हुन बिपती पड़ालो किरता मुरमुरा होउन दूत के बललो, रउक देस, एदांय आपलो हाथ के गुचाव। रयतमन चो सत्यानास नी कर! जहोवा चो दूत हुन समया ने अरोनाह नाव चो गोटोक जबूसी चो कोठार लगे रलो। 17 जिदलदांय रयतमन के सत्यानास करुक ईलो जहोवा चो दूत दाउद के दखा दिलो तेबे हुन जहोवा के बललो, “दख, पाप तो मय ची करलेसे! मानतर ए मेंडामन काय करलासोत? एईकाजे तुय मोचो आउर मोचो बुआ चो कुटुम के ची डंड देस।”
दाउद कोठार ने बेदी बनातोर
18 हुनी दिने गाद, दाउद लगे जाउन हुनके बललो, “जबूसी अरोनाह चो कोठार ने जाउन जहोवा काजे गोटोक बेदी बनाव।” 19 फेर दाउद जहोवा चो हुकुम हिसाब ले गाद चो ए गोट के धरुन हुता गेलो। 20 जिदलदांय अरोनाह, दाउद के कमेयामन संगे आपलो बाटे एतोके दखलो तेबे अरोनाह निकरुन भुंये पाटा पड़ुन राजा के डंडासरन करलो। 21 आउर अरोनाह बललो, “मोचो परभु राजा, आपलो कमेया लगे कसन ईलोसे?” दाउद बललो, “जहोवा चो गोटोक बेदी बनाउन रयतमन के मरी ले बचातो काजे मय तुचो कोठार के घेनुक ईलेसे।” 22 अरोनाह, दाउद के बललो, “मोचो परभु राजा के जोन थाने नंगत लागेसे, हुता बेदी बनाव। दख, होम-जतरा काजे तो बयलामन आसोत आउर आईग डसातो काजे खोटला आउर जुआंड़ी बले आसे। 23 मय ए तीजमन, राजा के देयंसे।” अरोनाह फेर राजा के बललो, “ए मोचो परभु राजा, तुचो महापरभु जहोवा ए जतरा ले हरिक होओ।”
24 राजा अरोनाह के बललो, “असन नोआय, मय तीजमन के मोल देउन तुचो ले धरेंदे, मय आपलो महापरभु जहोवा के फोकाहा ने धरलो बितीमन चो होम-जतरा नी चेगायें।” फेर दाउद कोठार आउर बयलामन के रूपा चो पचास सिक्कामन* ने घेनलो। 25 तेबे दाउद, हुता जहोवा काजे गोटोक बेदी बनाउन होम-जतरा आउर मिला-मिसा जतरा चेगालो। जहोवा हुन देस् काजे करलो गुहार सुनलो आउर हुन मरी इसराएल ले गुचली।