दाउद चो सरासरी गोटमन
23
दाउद चो सरासरी गोटमन एमन आय:जिसय चो बेटा दाउद बलेसे,
दाउद के महापरभु, राज-पन दिलो
आउर जाकूब चो महापरभु, दाउद के अबिसेक करलो
आउर दाउद, इसराएलिमन मन करतो गीत-कुरिया बले रलो।
2 जहोवा चो आत्मा ने होउन मय बलेंसे,
आउर हुनचेई गोट मोचो टोंड ले निकरली,
3 इसराएल चो महापरभु बललोसे,
इसराएल चो सिलपट मोके सांगलोसे
गोटोक राज करु लोगमन उपरे धरम ले
महापरभु के डरुन राज करेदे।
4 हुन बियान चो उजर असन आय,
उड़ई बेरा उदतो बेर असन आय,
हुन पानी उगाड़लो बेरा रोंडा अखरातो घाम असन आय।
5 “काय, मोचो कुटुम महापरभु चो नंजर ने असन नोआय?
हुन तो मोचो संगे अमदेया काजे बायदा करलोसे,
हुन बायदा पक्का आय आउर नी पलटे
महापरभु मोचो मुक्ति देउ आउर मोचो आसा आय
हुन मोचो बाड़ती करेदे ची।
6 मानतर महापरभु के नी मानतो सपाय अडरा लोगमन, पकाउन देतो काटा असन आत,
हुनके हाथ ले बेचुक नी होउआय।
7 हुनके छींवतो काजे लोहा चो छड़
नोहले सूरिया बीती भाला लागुआय।
एईकाजे हुनमन के, हुनमन चो ठान ने ची डसादे।”
दाउद चो बड़े बीरमन
8 दाउद चो बड़े बीरमन चो नाव एमन आय: तहकमोनेया जोसेब-बसेबेत, हुन तीन बीरमन चो मुखिया रलो। हुन गोटकी समया ने आपलो भाला ने आठ सव मनुकमन के मारलो।
9 हुनचो पाछे, हुन तीन बीरमन ले गोटोक, अहोही दोदो चो बेटा एलीआजर रलो। हुन, दाउद संगे रलोदांय पलिस्तीमन जुद काजे हुताय रूंडा होला, हुदलीदांय इसराएलिमन पाटे गुचला। 10 मानतर एलीआजर, आपलो बांहा थाकतले आउर हुनचो हाथ चेपटा होउन खांडा ने लटकत ले पलिस्तीमन के मारते ची रये। हुन दिने जहोवा हुनके जीतालो आउर हुनचो पाटे होलो लोगमन चुचाय झीका-उड़मा काजे ची हुनचो पाटे होला।
11 हुनचो पाछे, हरार बंस चो आगेय चो बेटा सम्मा रये। गोटोक हार, लही ने मुसरी दार चो बेड़ा ने पलिस्ती सेना रूंडा होला, तेबे इसराएलिमन हुताले पराला। 12 तेबे सम्मा, बेड़ा चो मंजी उबा होउन इसराएलिमन के बचालो आउर पलिस्तीमन के मारलो आउर जहोवा हुनके जीतालो।
13 तीस झन बीरमन ले तीन झन कटई चो दिनमन ने दाउद लगे अदुलाम नाव चो करपन ने ईला हुदलदांय पलिस्तीमन चो गोहड़ी रपाईम नाव चो घाटी ने तमु गाड़ुन रला। 14 हुन दिनमन ने, दाउद करपन ने रलो आउर राखा करु पलिस्तीमन चो तमु-भाटा बेतलहम ने रली। 15 दाउद खुबे पियास काजे धड़-धड़ातो के बललो, “बेतलहम चो देवड़ी लग चो चुंआ ले कोनी मोके पानी पियाहा!” 16 तेबे हुन तीनो बीरमन, पलिस्तीमन चो तमु-भाटा ने गेला आउर बेतलहम चो देवड़ी लग चो चुंआ ले पानी धरुन दाउद लगे आनला। मानतर दाउद हुन पानी के नी पीयें बललो आउर जहोवा चो पुरे उलदलो। 17 आउर बललो, “ए जहोवा, मोके ए पानी पीउक नी होओ! काय, मय हुन मनुकमन चो लोउ के पीउआंय जोनमन आपलो जीव चो फिकिर नी करुन जाउन रला?” ए तीनो बीरमन असने बुता करला। एईकाजे दाउद हुन पानी के नी पीयें बललो।
18 सरूयाह चो बेटा आउर जोआब चो भाई अबीसे*, तीस झन बीरमन चो मुखिया रलो। हुन आपलो भाला ले तीन सव झन के मारलो आउर तीनो बीरमन असन मान पावलो। 19 तीसो बीरमन ने हुन आगर मान पावलो, एचई किरता हुन, हुनमन चो मुखिया होलो। तेबले बले हुन तीनो बीरमन इतलो नी रये।
20 कबसेल ने रतो खुबे बरसक बीर जहोयादा चो बेटा बनायाह रलो, हुन खुबे बड़े-बड़े बुता करु बीता रये। हुन मोआबेया अरीएल चो दुय झन खुबे बरसक बेटामन के मारलो। करा घसरतो समया ने हुन, गोटोक खोदरा ने उतरुन बीजापुलिया-बाग के मारलो। 21 फेर हुन गोटोक सुंदर मिसरी के मारलो। हुन मिसरी भाला धरुन रये, मानतर बनायाह गोटकीचे ठेंगा धरुन हुनचो लगे गेलो आउर हुन मिसरी चो हाथ ले भाला के झीकुन हुनचो भाला ले हुनकेई मारलो। 22 असन-असन बुता करुन जहोयादा चो बेटा बनायाह हुन तीनो बीरमन असन नाव कमालो। 23 हुन, तीस बीरमन ले आगर मान पाउन तो रये, मानतर हुन तीनो बीरमन इतलो नी रये। दाउद, हुनके आपलो दखा-रखा करु बीता बनालो।
24 हुन तीस झन बीरमन एमन आत: जोआब चो भाई असाहेल, बेतलहम ने रतो दोदो चो बेटा एलहनान, 25 हेरोदेया सम्मा, आउर एलीका 26 पेलेती हेलेस, तकोआ इक्केस चो बेटा ईरा, 27 अनातोतेया अबीएजर, हूसाई मबुन्ने, 28 अहोही सलमोन, नतोपाहेया महरय, 29 गोटोक दुसर नतोपाहेया बानाह चो बेटा हेलेब; गिबा सहर चो बिनयामीनी रीबय चो बेटा इतय, 30 पिरातोनी बनायाह, गास चो नाहार लगे रतो हिद्दय, 31 अराबातेया अबी-अलबोन, बहूरीमेया अजमावेत, 32 सालबोनेया एल्यहबा, जासेन चो बेटा जोनातान, 33 हरारेया सम्मा, हरारेया सारार चो बेटा अहीआम, 34 माकाती अहसबय चो बेटा एलीपेलेत, गीलोया अहीतोपेल चो बेटा एलीआम, 35 करमेलेया हेसरो, अराबी पारय, 36 सोबा ने रतो नातान चो बेटा जिगाल, गादेया बानी, 37 अमोनी सेलेक, सरूयाह चो बेटा जोआब चो हतियार धरुबीता बेरोतेया नहरय, 38 इतेरी ईरा, आउर गारेब, 39 आउर हित्ती उरियाह रला। सपाय मिसुन एक कोड़ी सतरा बीरमन रला।