दाउद, महापरभु चो मयमा-गीत गावतोर
22
जहोवा, दाउद के हुनचो सपाय बयरीमन ले आउर साउल चो हाथ ले बचालो दिने, हुन जहोवा काजे ए गीत गावलो। 2 हुन बललो,जहोवा, मोचो चमकट सिलपट आउर मोचो भाड़ा आउर मोचो छंडाउ आय
3 मोचो महापरभु आउर मोचो चमकट सिलपट, तुचोने मय सरन पायंसे,
तुय मोचो ढाल आउर मुक्तिदेउ* आस,
मोचो डेंग भाड़ा आउर मोचो सरन पावतो ठान आस,
ए मोचो मुक्ति देउ, तुय उबढंगरी बुता ले मोके बचाउआस।
4 मयमा-मान चो लाईक जहोवा के मय हागदिले,
आउर हुन मोके मोचो बयरीमन ले बचालो।
5 जीव धरतो हलकामन मोके भोंवरक छेकला,
सत्यानास चो पूर-पानी मोके बुड़ाली,
6 पतालपुर चो डोरीमन मोके गुंडेयाउन रये
आउर मोरना चो फांदा मोचो पुरे मंडालोर रये।
7 गराहां ने पड़लोदांय मय जहोवा के हागदिले;
आउर आपलो महापरभु ले गुहारले।
हुन मोचो गोट के आपलो मंदिर ले सुनलो
आउर मोचो गुहार हुनचो काने अमरली।
8 हुन खुबे रीस होलो
तेबे मंजपुर हल्ली,
आउर उपरपुर चो पाया थरथरली।
9 हुनचो नाक ले धुंआ निकरली
हुनचो टोंड ले डसातो आईग
आउर रग-रगतो इंगरा निकरली।
10 हुन, सरग के लोआउन खाले उतरलो
आउर हुनचो पांय खाले पिरिचनाय अंधार रये।
11 हुन करूब ने बसुन उड़लो
आउर लेहरा चो पाटकी ने दखा दिलो।
12 हुन अंधार के आपलो उपरे घुमटालो
आउर करेया बादरी के तमु असन ओड़लो
13 आईग चो रग-रगतो इंगरा असन
हुनचो पुरे ले उजर निकरली।
14 जहोवा बादरी ले गरजलो
आउर सबुले बड़े महापरभु आपलो राग सुनालो
15 हुन कांड बींदुन-बींदुन बयरीमन के जत-खत करुन दिलो
आउर बीच घसराउन हुनमन के हरालो
16 जहोवा दिलो दागा
आउर हुनचो नाक चो फुंडा किरता
समदूर चो गड़िया दखा दिली
आउर मंजपुर चो पाया उखड़ली।
17 हुन उपर ले हाथ लमाउन मोके धरलो
आउर मोके गड़िया पानी भीतर ले झीकुन बाहरे निकरालो
18 हुन मोके खुबे बरसक बयरीमन ले
आउर घिनियातो लोगमन ले छंडालो,
जोन मोचोले खुबे बरसक बीतामन रला।
19 हुनमन मोचो बिपती दिन मोचो संगे लड़ला,
मानतर जहोवा मोचो साहरा होलो,
20 हुन मोके निकराउन ओसार ठाने उबालो
हुन मोचोले हरिक रलो किरता हुन मोके बचालो।
21 मोचो सत-धरम हिसाब ले जहोवा मोके पलटा दिलो
मोचो नंगत बुता चो हिसाब ले हुन मोके पलटा दिलो।
22 कसनबलले मय जहोवाचेई बाट ने हिंडते रये, आउर जहोवाचेई गोट धरते रये,
आउर आपलो महापरभु चो बिरुद दुसट बुता नी करले।
23 हुनचो सपाय नियम मोचो पुरे रये,
आउर मय हुनचो नीति-नियम ले नी गुचले।
24 मय हुनचो पुरे बदी नोहलो रये,
आउर आपनेके दोख नोहलो बचाउन रये।
25 हुनचो नंजर ने धरमकारी होउन सोज रलो किरता
जहोवा मोके मोचो धरम हिसाब ले पलटा दिलो।
26 सोज लोग संगे तुय सोज रउआस,
पतेयातो लाईक लोगमन संगे तुय पतेयातो लाईक रउआस,
27 पवितर लोगमन संगे तुय पवितर रउआस,
आउर कपट करुमन संगे तुय चलाक ने रउआस
28 सोज लोगमन के तुय बचाउआस,
मानतर गुमान करुमन चो गुमान के माटी ने मिसाउआस
29 ए जहोवा, तुयचे मोचो दिया आस,
आउर मोचो अंधार के उजर बनाउआस
30 तुचो साहरा ले मय सेना के नास करेंदे,
मोचो महापरभु चो साहरा ले मय सहरमन के जीतुक सकें।
31 महापरभु चो बाट चोखा आय,
परभु चो बायदा पुरा होउची आय,
हुनचो सरन ने एतो लोग काजे हुन ढाल आय।
32 जहोवा के छांडुन काय, कोनी दुसर महापरभु आसोत?
आमचो महापरभु के छांडुन काय, आउर कोनी सिलपट आसे?
33 ए हुनी महापरभु आय, जोन मोके भरपुर सकत देउआय।
हुन मोके सरसरा बाट ने हिंडाउआय।
34 हुन मोचो पांयमन के चीतरमन चो असन बनाउन देउआय
आउर मोके डेंग ठानमन ने उबाउआय।
35 हुन मोचो हाथमन के जुद करुक सिखायसे
एईकाजे मय मोचो बांहा ले पीतल चो धनु के लसाउक सकें
36 तुय मोचो मुक्ति चो ढाल आस
आउर तुचो साहरा ले मोचो बाड़ती होली।
37 तुय मोचो पांय काजे ठान के ओसार करुआस
आउर मोचो पांय नी फिसले।
38 मय आपलो बयरीमन के खेदुन हुनमन के सत्यानास करले
आउर हुनमन सपाय के मारुन पाछे ची मय बोहड़ले।
39 मय हुनमन के असन भेदले कि हुनमन उठुक नी सकोत।
हुनमन मोचो पांय खाले घसरुन पड़लासोत।
40 जुद काजे तुय मोचो करांड के बरसक करलीस,
आउर जोन मोचो बिरुद रला, हुनमन के मोचोई पुरे हरालीस।
41 मोचो बयरीमन मोके पाट करुन तुचेई किरता पराला
मोके घिनियाउमन के मय नास करले।
42 हुनमन गुहारला, मानतर हुनमन के बचातो लोग कोनी नी रला।
हुनमन जहोवा के गुहारला, मानतर हुन, हुनमन के काई उत्तर नी दिलो।
43 तेबे मय हुनमन के पेटुन-पेटुन भुंय चो माटी असन करुन दिले,
मय हुनमन के सड़क चो चिकल असन खुंदुन-रमंदले।
44 तेबे तुय मोके लोगमन चो झगड़ा ले छंडाउन
जात-जात चो लोगमन चो मुखिया रउक दिलीस
जोनमन के मय नी जानते रले हुनमन बले मोचो तलेया होला।
45 परदेसियामन के बले मोचो गोट के मानुक पड़ेसे
हुनमन मोचो नाव सुनते खन मोचो हक ने होयसोत।
46 परदेसियामन चो ढाढ़ुस टुटेदे
आउर हुनमन आपलो भाड़ामन ले थर-थरते निकरदे।
47 जहोवा जीव आसे! मोचो सिलपट धन-धन आय!
आउर महापरभु जोन मोचो मुक्ति चो सिलपट आय हुनचो मयमा होओ
48 मोचो काजे पलटा धरु महापरभु धन-धन आय,
जोन जात-जात चो लोगमन के मोचो हक ने करलो,
49 आउर मोके मोचो बयरीमन ले बचालो।
हव, तुय मोके मोचो बिरुद होतो लोगमन ले जीतालीस,
आउर मोके मारा-पेटा करुमन ले बचालीस।
50 एई किरता ए जहोवा, मय जात-जात चो लोग पुरे, तुचो बड़ाई करेंदे।
आउर तुचो नाव चो मयमा-गीत गायंदे।
51 हुन, डेंग भाड़ा असन रउन आपलो राजा के जीताउआय,
आउर आपलो बाछलो दाउद आउर हुनचो कुटुम उपरे
जुग-जुग काजे दया करते रयदे।