इसराएलिमन उपरे गिबोनीमन पलटा धरतोर
21
दाउद चो राजपाट बेरा सरलगा तीन बरक ले भूक पड़ली। तेबे दाउद, जहोवा ले गुहारलो। तेबे जहोवा बललो, “साउल आउर हुनचो कुटुम उपरे लोउ बोहातो दोख होली। साउल, गिबोनीमन के मोरालो किरता भूक पड़ली।” 2 तेबे राजा, गिबोनीमन के हागदेउन हुनमन ले गोटेयालो, (गिबोनीमन, इसराएलिमन ले नी रला। हुनमन बाचलो एमोरीमन ले रला। इसराएलिमन हुनमन संगे मोरते नी मारतो किरिया खाउन रला। मानतर साउल, इसराएलिमन आउर जहूदीमन चो भर ने रलो किरता हुन, हुनमन के मोरते मारतो उआट करुन रये।) 3 तेबे दाउद, गिबोनीमन के पुछलो, “मय तुमचो काजे काय करेंदे? आउर दोख चो खंडान काजे काय करुक सकें जेचोले तुमी जहोवा चो निज बाटा इसराएल के बर दियासे?” 4 गिबोनीमन हुनके बलला, आमचो आउर साउल आउर हुनचो कुटुम चो मंजी चो झगड़ा पयसा-कोहड़ी ले नी बुते। कोनी इसराएली के मोरते मारतोर हक आमके नीआय। हुन बललो, “जसन तुमी बलासे उसने आमी तुमचो काजे करुंदे।” 5 हुनमन राजा के बलला, “जोन मनुक आमके सत्यानास करलो आउर आमचो बिरुद असन उआट बनालो कि इसराएल देस् ले आमी सत्यानास होउन जाउं, 6 साउल चो सात झन बेटामन के आमके सोपुन दिया। आमी हुनमन के जहोवा चो पुरे गिबा† ने, जहोवा चो बड़े डोंगरी ने उचकून देउंदे।” राजा बललो, “हुनमन के मय सोपुन देयंदे।”7 मानतर दाउद राजा, साउल चो बेटा जोनातान संगे जहोवा चो किरिया† खाउन रलो। एईकाजे राजा, साउल चो नाती जोनातान चो बेटा मपीबोसेत के बचाउन रलो। 8 मानतर अय्याह चो बेटी रिसपा के साउल बाटले होलो दुनो बेटामन, अरमोनी आउर मपीबोसेत, आउर साउल चो बेटी मेरब के महोलेया बरजिलय चो बेटा, अदरीएल बाटले होलो पांचो बेटामन के राजा धराउन 9 गिबोनीमन चो हक ने करुन दिलो। आउर हुनमन डोंगरी उपरे जहोवा चो पुरे हुनमन के उचकला, आउर सात झन गोटकी संगे मोरला। हुनमन के मारतोर जोंदरी कटई चो मूर दिनमन ने होली।
10 तेबे अय्याह चो बेटी रिसपा, मोरना चो करलानी किरता आपलो पोता फटई के गोटोक पकना उपरे ओचाली, आउर हुन, जोंदरी कटई चो मूर ले धरुन चमास अमरतले, मोड़ीमन लगे बसुन रली। हुन, दिन ने बादरी चो चड़ईमन के मोड़ी उपरे बसुक नी दिली आउर राती बेरा, रान-जनावरमन के हुनमन चो मोड़ी लगे अदड़ुक बले नी दिली। 11 जिदलदांय अय्याह चो बेटी रिसपा बललोने, साउल चो राकलो बायले करलानी किरता करलो बुता चो खबर दाउद के मिरली, 12 तेबे दाउद, जाबेस-गिलाद चो मुखियामन लगे जाउन साउल आउर जोनातान चो हाड़ामन के धरलो। पलिस्तीमन, साउल के गिलबो डोंगरी ने मारुन बेतसान चो जोड़ान ने ओराउ रला। मानतर हुनमन के जाबेस-गिलाद चो जुवानमन लुकाउन नेउन रला। 13 दाउद, जाबेस ले साउल आउर हुनचो बेटा जोनातान चो हाड़ामन के धरुन ईलो; गिबोनीमन उचकलो सात झन चो हाड़ामन के बले हुनमन रूंडाला। 14 फेर हुनमन, साउल आउर हुनचो बेटा जोनातान चो हाड़ामन के बिनयामीन बंस बाटा चो सेला सहर ने साउल चो बुआ कीस चो मोठ लगे गाड़ला। दाउद राजा चो हुकुम हिसाब ले हुनमन सपाय बुता करला। एचो पाछे महापरभु, देस चो बर काजे इसराएलिमन करलो गुहार सुनलो।
पलिस्तीमन, इसराएलिमन संगे जुद करतोर
15 पलिस्तीमन, इसराएलिमन संगे फेर जुद करला, आउर दाउद आपलो सपाय बीरमन संगे जाउन पलिस्तीमन संगे लड़लो आउर लड़ते-लड़ते थाकलो। 16 तेबे जिसबी बनोब उठलो, हुन रपाई* चो थरलर ले रये आउर दाउद के मोरते मारतो मन बनाउ रये। हुनचो भाला चो बोजा तीन सव सेकेल* पीतल रये। हुन आपलो करांड ने नवा खांडा बांदुन रये। 17 मानतर सरूयाह चो बेटा अबीसे, दाउद चो साहरा काजे ईलो आउर हुन पलिस्ती के मोरते मारलो। तेबे दाउद चो सपाय लोग किरिया खाउन हुनके बलला, “आमचो संगे तुय जुद ने फेर नी जाउक सकसे। तुचो मोरलोने, इसराएल चो दिया लिबुन जायदे।”
18 एचो पाछे, पलिस्तीमन संगे गोब ने फेर जुद होली। हुन समया हूसाई सिब्बकय, सप नाव चो असूर के मारलो जोन रपाई थरलर ले रये। 19 गोब ने पलिस्तीमन संगे फेर जुद होली, हुता बेतलहमेया जार-जोरगीम चो बेटा एलहनान, गत्ती गोलियत चो भाई के मारलो। हुनचो भाला चो ढेटा खातकार चो मड़* असन रये। 20 फेर गत ने बले जुद होली, हुताय रपाई थरलर ले गोटोक बड़े बल बीता असूर रये, हुनचो गोटोक-गोटोक हाथ-पांय ने छय-छय ठन अंडकीमन रये बललोने, हुनके चवबीस ठन अंडकीमन रये। 21 जेबे हुन इसराएल के खुरलालो तेबे दाउद चो भाई सिमा चो बेटा जोनातान हुनके मारलो। 22 ए चारो बड़े-बीरमन, गत सहर चो रपाई थर-लर चो रला, मानतर दाउद आउर हुनचो बीरमन ए चारो बड़े-बीरमन के आपलो हाथ ले मोरते मारला।